11 Feb 2019 06:17

inkhel

Real Madrid tan theih loh a awm lo: Solari

Santiago Solari chuan Real Madrid tan thil tih theih loh a awm lo nia sawiin, UEFA Champions League title chu a zawnin vawi 4 an lak theih a rin thu a sawi.

Tun hnaiah Real Madrid chu Europe khawmualpuiah an chungnung hle a, a zawnin Champions League title pawh vawi thum an la tawh a, tun season kal mekah pawh title la thei dinhmunah an la ding ve mek zel a ni.

Tun season bikah chuan Real hian beisei an pha lo hle a, heti chung hian coach Santiago Solari chuan title an lak leh theih ngei a rin thu a sawi a, tun season chhunga an la leh a nih chuan a zawnin European title hi vawi 4 an la thei dawn a, hetianga ti thei hmasa ber hi an ni ang.

A zawna Champions League title vawi 4 la thei tur chuan Real Madrid hian last 16-ah Dutch club lian Ajax Amsterdam chu an pal tlang phawt a ngai dawn a. Real leh Ajax te hi Nilaini hian Amsterdam khawpuiah an inhmachhawn dawn a, first leg an khel ang a, Madrid khawpuiah second leg an khel ve leh dawn a ni.

Real Madrid leh Ajax Amsterdam te hi tun hma atangin an lo inkhel ve fo tawh a, vawi 12 inkhel tawhin Real Madrid chu vawi 7 an chak tawh a, vawi 1 inhnehtawkin Ajax hi vawi 4 an chak ve tawh a. Ajax chak hnuhnun ber hi 1995 daih tawh khan a ni a, hei vang hian Real Madrid chuan tlang chhoh theih zel an inring hle.

Solari chuan, “Ajax hi naupang chher chhoh kawngah an lar hle a, a that pawh an tha hle a ni tih chu khawvel hriat a ni a. Attacking football hmuhnawm tak an entir thei reng a, player naupang tha tak tak an chhawr tangkai thei hle bawk a ni,” a ti a.

“Tunah pawh an kalphung chu a la danglam chuang lo a, nikum lamah pawh an that zia an lantir thei a, kuminah pawh an la danglam chuang miah lo a. Kan tan pawh game awlsam tak beisei chi a ni lo tih a chiang a, mahse a vannei zawka kan tan hi kan ring tlat a ni,” a ti bawk.