10 Sep 2018 07:12

inkhel

Real Madrid President atan Nadal ka duh: Perez

Rafael Nadal chu Real Madrid ngaisang em emtu a ni a, March 2011 khan President Florentino Perez kaltlangin honorary member a ni nghe nghe a. Perez hian Nadal chu nakin zelah Real Madrid President ni tura a duh thu a sawi.

Real Madrid President Florentino Perez hian Nadal hi a ngaisang em em mai a, khawvel pumpuia Real Madrid ambassador lo ni tawh zawng zawngah chuan Nadal chu a tha ber a nih thu a sawi a. Nadal chu Real Madrid President atan a duh thu sawiin, nakinah chuan nih pawh a la ni maithei niin a sawi bawk.

Kum 72-a upa Perez chuan, “Real Madrid President ni tur hian Rafael Nadal hi a that ka ring tlat a, eng tikah emaw chuan a la ni lo ang tih pawh a sawi theih loh a ni,” a ti.

Kum 15 zet President lo ni tawh Perez chuan Real Madrid President ni thei tur chuan a lo berah kum 20 chhung member nih a ngaih thu a sawi a. Heti a nih chuan 2011 atanga honorary member ni tan Nadal tan chuan President post chuh theih hmain member nih rei a la ngai rih dawn a ni.

Rafael Nadal hian President nih hi a tum ve tak tak dawn a nih chuan kum 45 mi niin 2031 velah a chuh ve thei dawn chiah a. “Eng tikah emaw chuan Real Madrid President nih theih ngei chu ka chak a. He club hian tunah chuan President an nei tha hle a, tuna lo ngaihtuah lawk vak theih chi pawh a ni chiah rih lo,” tiin a sawi.

A sawi zelnaah, “Tun dinhmunah chuan Real Madrid hi an la che tha em em a, kawng hrang hrangah hma an sawn belh zel a, min la mamawh rih lo hle a. Mahse, nakin zelah chuan eng dinhmunah nge an din dawn a sawi theih loh a, min mamawh hun pawh a la inher chhuak ve thei tlat a ni,” a ti bawk.