Arsene Wenger chuan engtikah mah Real Madrid manager a nih dawn loh thu sawiin, La Liga club in an sawmna pawh vawi khat aia tam a lo hnar tawh thu a sawi.

Arsenal manager hlui Arsene Wenger chuan Emirates Stadium a chhuahsan hnuah hna chelh a la nei zui lo a, tun hnaiah club enkawl chu a chak leh tawh thu sawiin, Santiago Bernabeu lama luh erawh a tum loh thu a sawi a ni.

Wenger hian kum 22 chhung zet Arsenal a enkawl hman a, hemi chhung hian Real Madrid chuan an club enkawl turin an dawr zeuh zeuh nia sawiin, Real chu khawvela club lian ber ni mahse an sawmna chu a hnar zel thu a sawi a. Tun hnaiah pawh head coach Santiago Solari thlaktu tur anga sawi rik a awm a, Wenger chuan a hma pawha a lo hnar tawh chu tuna pawm a tum loh thu a sawi a ni.

Kum 69-a upa Arsene Wenger chuan, “Vawi khat aia tam chu Real Madrid sawmna hi ka lo hnar tawh a, tuna lo pawm thar leh vel hi ka tum lem lo a. A nihna takah chuan ka duhtawk tawh rih a ni,” a ti.

“Khawvel hmun hrang hranga manager te hi Real Madrid an enkawl duh leh duh loh zawt ila, tu pawhin an duh thu an sawi nghal vatin ka ring a. Anni tluka club lian hi khawvelah an awm lo tlat a ni,” a ti bawk.

A sawi zelnaah, “A hma atang tawhin an club enkawl tura min sawmna ka lo hnawl tawh thin a, tun thlengin ka thutlukna siamah khan inchhirna ka la nei miah lo a. Ka thil tawn chhoh tawh te ka ngaihtuahin ka chan tawkah khan ka lung a awi viau a ni,” a ti.