Jose Mourinho chuan Real Madrid leh Zinedine Zidane te inzawm leh chu duhthusam a nih thu a sawi.
Mourinho chuan 2010 leh 2013 inkar khan Real Madrid chu a lo enkawl ve tawh a, hmanni lawkah UEFA Champions League-a Ajax an hneh loh hnua an tlak takah khan Santiago Solari thlaktu tura sawi kai a ni zui a. Club thuneitute’n Santiago Solari an ban hnuah a aiawh tur hian an manager hlui tho Zinedine Zidane chu an la leh ta a ni.
Real Madrid chief hlui Ramon Calderon chuan tuna an president Florentino Perez chuan an club enkawl leh turin Jose Mourinho chu a duh ber tih sawiin, an club senior player te leh staff tam tak chuan Zidane an duh zawk avangin Perez hian a tam zawk duh dan chu a zawm ve ta niin a sawi bawk.
Portuguese manager Mourinho hi December 2018 khan Manchester United chuan an club manager a nihna atangin an ban a. A club enkawl thin Real Madrid in Santiago Solari an ban hnua Zinedine Zidane an la lut leh chu French manager that zia lantirtu a nih thu a sawi chhuak.
“Hun eng emaw chen an inthen hnuah Real Madrid leh Zinedine Zidane te an inrem leh thei hi duhthusam a ni a, club lamin an manager lo ni tawh an sawm leh duh hi thil danglam tak a ni bawk a. Real meuhin an sawm nawn duh a nih chuan Zidane hi a tha hle a ni tih a chiang mai,” tiin Mourinho chuan a sawi.
“Zidane hian Real a kaihhruai hun chhung rei lo viau mahse thil tha leh ropui tak tak a hlen chhuak teuh hman a. Tuna an che fuh lo chho pawh hi a kaihhruaina hnuaiah a dik chhoh leh duak ka ring,” a ti bawk.
A sawi zelnaah, “Hetianga an inzawm leh thei ta hi ka tan pawh duhthusam a ni a, Madrid tan lah duhthusam a ni chiang hle a, Zizou tan pawh duhthusam a ni ve leh zel bawk a. Tunah chuan a that zia lantir belhchhahna hun tha a nei leh ta chiah a, hmasawnna thar a thlen leh ngei ang tih hi ka ring a ni,” a ti.
Zinedine Zidane chuan January 2016 leh May 2018 inkarah khan Real Madrid hi a enkawl a, Santiago Bernabeu-ah hian thla 28 chu hun a hmang a. Hemi chhung hian a zawnin vawi thum chu UEFA Champions League title a lakpui hman a, La Liga title vawi khat lain, Spanish Super Cup pakhat, UEFA Super Cup pahnih leh FIFA World Club Cup pakhat a lakpui bawk a ni.