Manchester United midfielder manto Paul Pogba chuan Zinedine Zidane-a enkawl mek Real Madrid tana khelh chu duhthusam a nih thu a sawia, ama tan chauh pawh ni lovin, footballer tan hrim hrim chuan duhthusam a nih thu a sawi tel.

Zidane hi player a nih laia a that zia leh a ropui zia chu sawi tam a ngai lova, manager hna a luhchilh hnu pawhin kum tlemte chhunga football manager awm tawh zinga hlawhtling leh ropui ber pakhatah a inhlangkai thei.

Real Madrid chu a zawna Champions League nomawi vawi thum ngawt a chawipui hnuah nikum nipui lai khan Zidane hian Santiago Bernabeu a chhuahsan thuta, hemi hnu hian Los Blancos in ngai an awh leh tawh lo. Ngai an awh theih loh avangin tun season-ah manager pahnih an ban hnuah Real chuan Zidane hi an ko leta, an ruai nawn leh.

Pogba hi bazar hun a inhawnin thawm nei pawl a ni ziaha, Jose Mourinho awm lai phei kha chuan United chhuahsan tura ngaih a ni hman. Mahse tunah erawh interim manager Ole Gunnar Solskjaer-a hnuaiah a hlima, a khel tha a, thawm pawh a nei khat tawh angreng hle.

Tunah hian France-ah haw in Pogba hi a ram tana inkhelin a awm mek a, Real Madrid pan chungchang zawh niin, Pogba chuan, “Ka lo sawi thin tawh angin Real Madrid-a luh hi chu tu tan pawh duhthusam a ni a, khawvela club lian ber pakhat a ni.

“An coach Zidane a ni bawk nen, football ngaina mi tan chuan kal chak lohna chi a ni lo. Tunah erawh Manchester United-ah ka awm a, ka hma lam hun thlir lawk theih a ni lo. United-ah ka awm a ka hlim bawk a ni,” tiin a sawi.