12 Jul 2019 10:22

bakteaJr.

Mizo tlangval

​Real Madrid leh Barca-in Neymar an inchuh dawn?

Paris Saint-Germain chhuahsan duh Brazilian star Neymar chu La Liga heavyweight club pahnih Real Madrid leh Barcelona chuan an inchuh dawn niin Sky Sports chuan a tarlang.

Neymar hian PSG chhuahsan a duh avangin tun kar tir khan pre-season training nei turin a kir duh lova, hemi hnu lawk hian PSG lam chuan an lungawina tawka dawrtu an awm a nih chuan Neymar hi chelh zui an tum loh thu an sawi zui ve nghal bawk.

Naymar hi a club hlui Barcelona nen sawizawm a ni nasa hle a, Barcelona pawh hian a chungchangah PSG an lo be tawh tih PSG lam hian an sawi a, Barca-a kir leh mai tur angin Neymar hi ngaih a ni chho mek.

Neymar hi khawvela footballer manto ber a ni a, PSG chuan euro maktaduai 222 in Barcelona atangin an lei chhuak a nih kha!

Barcelona president Josep Bartomeu pawhin Neymar hi PSG atangin a chhuah duh thu a lo sawi tawh a, Neymar hian chhuah dan kawng a dap mek niin a lang. Barca hian chuhpuitu an nei hrawl dawn hle niin Sky Sports chuan a tarlang a, an hmelma lian ber Real Madrid an rawn lang ve ta tlat mai.

Barcelona hian sum an ngah hle a, an hmelma Real Madrid hi an theuneu bik hauh lo. Duh duh lalut thei ve ve an ni a, Real hian sum an thehchhuak huai zawk tih pawh hai rual a ni lo.

Tun hnaiah Real leh Barca-te hi inthuam that an mamawh zia kan hre vek a, tun nipui bazar chhungin player pawh an lalut nual ve ve tawh. Neymar hi heng club ropui pahnih hian an inchuh tak tak a nih ngat chuan a sum hrawm a na dawn a, huhang an ngah dawn hle a, player inchuhna bawn ber hi tun bazar hun chhung hian a thleng lovang tih a sawi theih hauh loh a ni.