Real Madrid in a zawna vawi thum ngawt UEFA Champions League title an lak theih avang khan WWE (World Wrestling Entertainment) chuan lawmpuina atan Championship Belt an pe.

WWE star ni thin, tuna WWE COO Triple H chuan a hranpa ngata an siamtir championship belt hi Real Madrid hnenah chuan a hlan a. Twitter-ah belt thlalak hi tarlangin, “Kum 3 chhung a zawna UEFA Champions League title an lak theih avangin Real Madrid hian WWE champion angin an champion hi an lawm tur a ni. Hala Madrid!” tih thu ziak hi a telh bawk a ni.

Tun tum hi football team in WWE championship belt an dawn hmasak ber a ni lo a. Boca Juniors leh Chelsea te pawhin dawng tawhin, Manchester City in Premier League title an lak khan Triple H hian City hnenah pawh a lo thawn tawh bawk.

Zinedine Zidane kaihhruaina hnuaiah Kiev, Ukraine khawpuia NSC Olimpiyskiy Stadium-ah Real Madrid chuan UEFA Champions League final-a an khingpui Liverpool chu 3-1 in an hneh a, Champions League tih a nih hnua a zawna vawi thum champion thei awm chhun an ni a. Real Madrid an champion ni chiah hian WWE star pathum - Nikolai Volkoff, Brian Lawler leh Brickhouse Brown te chu an thi ve chiah hlawm niin an sawi a ni.

He championship belt an hlan sirah hian Real Madrid logo pawh an dah tel a, hetiang deuh hi Indian Premier League (IPL) team Mumbai Indians hnenah te leh NBA, NFL leh Major League Baseball champion te hnenah pawh an lo pe tawh bawk a ni.

Real Madrid chuan Twitter-ah lawmthu an sawi a, Lucas Vasquez leh Dani Carvajal te’n championship belh thla an lakpui chu dahin, “WWE Champions.. WWE Superstars.. Kan inkhel in rawn en theih chuan a lawmawm ngawt ang,” tiin an dah a ni.