25 Mar 2019 05:56

inkhel

Real Madrid-in Sadio Mane lei an tum maithei

Real Madrid chuan Liverpool atanga Sadio Mane lak tumin beihpui an thlak maithei niin an sawi.

Zinedine Zidane chuan Senegal winger Sadio Mane hi Real Madrid a enkawl hmasak lai atang tawh khan lak luh a lo duh tawh a. Mahse, Los Blancos a chhuahsan leh tak avang khan engmah bawhzui a awm thei ta lo a. Tunah chuan Real a enkawl leh tan tawh a, a hmaa tih hlawhtlin a duh kha a taka bawhzui a rilruk leh niin an sawi a ni.

Spanish club lian Real Madrid hian Sane hi lei an tum tak tak a nih chuan a lo berah £73 million vel tal chu sen an inhuam a ngaih hmel hle a. Nikumah khan club pahnihte chu Mane chungchangah hian an inbe fel hman vek tawh niin thuthang a awm a, mahse Zidane ber a chhuah leh tak avang khan engmah an ti zui ta lo niin sawi a awm a ni.

A hma deuhin Real Madrid chuan Chelsea atangin Eden Hazard lak an tum niin an sawi nasa hle a, mahse Chelsea hi player lei leh hralh thei lo tura hrem an nih avangin Real Madrid chuan hmun dangah an mit an len leh ta a, Liverpool winger hi an melh zui ta a ni.

Tun season chhungin Jurgen Klopp hnuaiah Mane hi a che chhe lem lo hle a, inelna hrang hrangah goal 20 a thun tling tawh a, Liverpool striker Mohamed Salah nen an goal thun zat a inang chiah tawh a ni.

Liverpool hi sum lamah chuan an ngaihtuahawm loh lai tak niin, pawisa mamawh vang ngawr ngawr chuan Sadio Mane hi an hralh a rinawm lo hle a. Mane hian Anfield-ah kum li chhung atan contract a la nei mek bawk a, hei vang hian Real Madrid in an duh tak tak dawn a nih pawhin awlsam taka an lak theih a rinawm lo hle.