Zinedine Zidane chuan nipui transfer window inhawn hunah Real Madrid chin kual viau a tum dawn a, an player neih sa 14 vel zet chu chhuahtir a tum niin an sawi.

Real Madrid chu tun season chhungin an che tha lo hle a, La Liga mai bakah UEFA Champions League lamah pawh an che chhe ve ve a. Europe lamah chuan last 16 an pal tlang zo ta lo a, an title kawl lai an humhim thei ta lo a, season tawpah title lak an nei ta lo a ni.

Zidane chuan season thar tan hma ngeiin player siksawi a tum hle a, Bernabeu Stadium-ah Eden Hazard, Paul Pogba leh Luka Jovic te chu seng luh theih a duh a. Player a lei thar dawn chuan an neih sa chu hralh chhuah nual a tum a, heti a nih chuan Keylor Navas, James Rodriguez leh Gareth Bale te tan hun tawp a ni thei dawn niin Marca chuan an tarlang.

Spanish club lian hian season tan hmaa inpuahchahna atan United States lamah hun an hmang dawn a. July 8 a US lam an pan turah hian Zidane chuan player 19 a hruai dawn a, heta a hruai bak hi chu an hmakhua a thim viau tura ngaih a ni.

Keylor Navas chu 2019-20 season atan mamawh a nih tawh loh tur thu leh a khelhna tur team zawng turin an hriattir tawh niin an sawi a. Thibaut Courtois chu an rinrawl tur niin, a tha chhang dawltu tur hi Andriy Lunin leh Luca Zidane te an la awm a ni.

Defender zingah Jesus Vallejo, Theo Hernandez leh Sergio Reguilon te chu tun nipui thleng bak Bernabeu-ah chuan an awm tawh hmel loh hle a. Zidane chuan Lyon full back Ferland Mendy chu Marcelo nen inthlawp thei tura lak a duh a, season tawp hunah Eder Militao pawhin Porto atangin Real Madrid hi a zawm dawn bawk a ni.

Mateo Kovacic, James Rodriguez leh Martin Odegaard te chu midfielder zinga chhuak tura rin kai berte an ni a. An hmun ruak luah tur hian Real chuan Paul Pogba, Christian Eriksen leh Donny van de Beek te chu an beisei dawn niin an sawi a. Dani Ceballos, Marcos Llorente leh Oscar Rodriguez te pawh hmun dang pan tura rin kai zingah an tel bawk.

Gareth Bale pawh khelhna tur dang a zawng a nih loh chuan first team-ah chuan a tel theih tawh loh tur thu an lo hrilh tawh a. Club danga a kal lo a nih chuan U-23 team lamah a khelh a ngai dawn niin club thuneitute chuan an hrilh a ni.

Paris Saint-Germain, Tottenham Hotspur leh Manchester United te chu Welsh star la thei dinhmuna ding niin an sawi a. Eden Hazard chu Bale thlaktu tura an beisei niin, Real Madrid chuan £86 million velin Chelsea star hi lei theih an inbeisei a ni.

Lucas Vazquez, Brahim Diaz leh Mariano Diaz te pawhin an awm zel dan tur chu hriat chian vat duhin an ngaichang mek bawk a ni.

Chhuak thei dinhmuna dingte

Goalkeeper
Keylor Navas

Defenders
Jesus Vallejo, Theo Hernandez and Sergio Reguilon

Midfielders
Dani Ceballos, Marcos Llorente, Mateo Kovacic, James Rodriguez, Martin Odegaard and Oscar Rodriguez

Forwards
Gareth Bale, Lucas Vazquez, Brahim Diaz and Mariano Diaz