Real Madrid chuan season thar atan intuaithar an tum hle a, hetiang ti tur hian Kylian Mbappe leh Neymar te thu leh hla an ngaichang mek niin an sawi.
La Liga club lian Real Madrid chuan tun season kha an hmang fuh lo hle a, season tawp hma deuhin Zinedine Zidane chu an ruai leh a, a kaihhruaina hnuaiah hian nasa taka insiamthat an tum hle a. Nipui transfer window inhawn hunah an player neih sa eng emaw zat hralh chhuah a, a thar lak belh nual an rilruk a ni.
Zinedine Zidane chuan Galactico thar tur a melh tan tawh a, Eden Hazard leh Paul Pogba te chu a melh hmasak berte an ni a. Hetih rual hian Paris Saint-Germain star pahnih Kylian Mbappe leh Neymar te nen pawh an sawi zawm nasa hle.
Spain rama chanchinbu lar AS chuan Kylian Mbappe emaw, Neymar emaw chu Real Madrid hian lak an hreh lo niin an tarlang a. Hemi hi a taka thleng thei tur chuan player pahnihte thu leh hla an ngaihchan hmasak erawh a ngai thung.
Nilaithawhtan zinga AS chanchinbu phek hmaah chuan lian tak maiin ‘Mbappe nge Neymar? Florentino tan chona’ tih an dah kuau a ni.
Kylian Mbappe chuan kar hmasa Pathianni khan chawimawina a dawng a, Ligue 1 Player of the Year atan an thlang a. Chawimawina a dawn tum hian Mbappe chuan hmun dangah chona thar a hmachhawn thut thei niin a sawi thuak a ni.
Mbappe chuan, “Tun season chhungin lungawi famkim chiah lohna thil thenkhat a awm a, khatiang kha chu football khawvela thil thleng ve hrim hrim thin a ni a. Duhthusamin awm thei ta lo mah ila league title chu kan la thei ta tho a ni,” a ti.
“Kan champion theihna kawngah khan player te, coach leh club chungah lawmthu ka sawi mawlh mawlh a. Ka tan chuan ka hun tawn hi a pawimawh em em a, ka nun kawngah hun inher danglam vawi khatna emaw, vawi hnihna emaw ka tawng mek a ni,” a ti bawk.
A sawi zelnaah, “He lai hmunah hian thil thar tam tak ka zir chhuak a, tunah chuan mawhphurhna sang zawk chelh theih hi ka duh a. Paris Saint-Germain ah a nih ngei ka beisei a, ni thei se a lawmawm viau ang a. A nih loh vek pawhin hmun dangah te pawh a ni thei a, chona thar ka hmachhawn thei bawk a. Eng thil pawh thleng se ka lawm em em mai a ni,” a ti.