Chelsea striker Romelu Lukaku chuan Inter-ah season chhe tak a hmang mek. Inter tana a khelh hmasak kha chuan ropui takin a khel a nih kha, tun season erawh a talbuai hle mai.

Goal a khung thei lo a, a fitness a tha tawk lo a, a inhliam deuh reng bawk nen, heng te a nih avang hian Inter chuan a ngheta lei an rilruk lem lo niin Italy lam chanchinbu te chuan an tarlang.

Chelsea pawhin kum 29 mi Belgian striker hi hralhna an zawng nia report a awm mek a, Inter hian a ngheta lei an duh a nih chuan Blues chuan chhuahtir an hnial dawn lo.

Hetih lai hian Inter CEO Giuseppe Marotta chuan, "Chelsea-ah a kir leh phawt ang, loan-a kan hawh a ni a, chu chu kan indawrna kalphung a ni, a bak erawh kan la hre chhunzawm zel ang chu," tiin a sawi a nih kha.

August 2021 khan £97.5million laiin Chelsea-in Lukaku hi an la lut a nih kha. Tunah chuan Chelsea leh Inter pawhin chelh an duh tawh lo ve ve niin a lang a.

Hetia inhnawn deuh anga thil a kal mek lai hian Real Madrid an rawn lang, Spanish club hian man tlawm zawka Lukaku lak theihna hun remchang an dap mek niin The Sun chuan a tarlang a ni.