Real Madrid chu an tum anga an chet that theih loh avangin Julen Lopetegui dinhmun a duhawm lo hle a, Real hian Lopetegui thlaktu tur an melh tan niin an sawi a, Antonio Conte chungah an mit a fu mek niin an sawi.
Julen Lopetegui chuan tun season-ah Real Madrid chu a chet thatpui vak rih lo hle a, hei vang hian club director te lung a awi lo tan a. Club thuneitute hian Lopetegui chu hun tlemte an pe leh ang a, chuta engmah a la an loh chuan a aiawh tur hi lak an rilruk a ni.
Italian chanchinbu Corriere dello Sport in an tarlan danin Real Madrid boss Lopetegui chu club thuneitute chuan game thum chhung an enthla leh ang a, chutah pawh hmasawnna an hmuh lem loh chuan Santiago Bernabeu atanga a puanthuah teltir an tum tawh niin an tarlang.
Tun season chhungin La Liga game 8 an khel tawh a, hengah hian Real Madrid chu palina an ni thei chauh a. An game hnuhnung paliah vawi thum an chak lo a, Sevilla, CSKA Moscow leh Alaves te chu an hneh lo vek a ni.
La Liga club lian te hian kumina FIFA World Cup khelh hma deuh khan Spain manager ni lai Julen Lopetegui chu an lo bia a, a hmaa Real Madrid manager Zinedine Zidane a chhuah thut avangin a hmun ruak luah turin Lopetegui hi an thlem thlu thut a, Spanish FA pawh an thin a rim viau nghe nghe a.
Lopetegui leh Real Madrid te inbiak hnu hian inremna thuthlung an ziak zui a, Russia rama Spain inkhelh hma ni hnih la awmin Spanish FA chuan Lopetegui hi an ban zui nghal a. An hriatpuina leh remtihpuina tel loa Real Madrid a lo be fel mai chu an duh lo a, an bantir nghal a ni.
Real Madrid hian October thla chhungin game thum an khel dawn a, ni 20 hian Levante an mikhual ang a, 23 ah Viktoria Plzen an mikhual leh ang a, 28 ah Camp Nou an pan ang a, Barcelona nen El Clasico an khel ang a. Heng game 3 ah hian eng vak mah an ang lo a nih chuan Lopetegui zinkawng hi a tawp nghal dawn a nih hmel a. Kum khat chhungin hna pahnih atangin an ban dawn tihna a ni ang.
Chelsea in nipui laia an chhuahtir hnuah Antonio Conte chuan hna chelh a la nei leh rih lo a, Real Madrid chuan Julen Lopetegui hi an ban a nih chuan a hmun ruak luah tur hian kum 49-a upa Conte hi an duh deuh ber rih a ni.