Real Madrid chu an bazar nasa hle a, an team siam that ngai ve tawh tak chu siam that tum mek zelin, Lyon atangin defender an lei fel leh ta.

Real hian French club Lyon atang hian French left-back kum 24 mi Ferland Mendy an lei fel a, kum ruk daih contract ziahpuiin, tun thla ni 19 hian Real hian official in Mendy hi an pho chhuak ang.

Mendy-a manah hian Real hian pound maktaduai 47 an senga, tun nipui chhunga an player lakluh pangana a ni ta der mai. Real hian tun nipui chhungin Mendy bakah hian Luka Jovic, Eden Hazard, Eder Militao leh Rodrygo Goes-te chu an lo lalut tawh hlawm bawka, pound maktaduai 300 chuang an seng der tawh.

Mendy hian Le Havre atangin kum 2017 nipui lai khan Lyon a pana, Lyon tan hian tun season hman zawh takah khan vawi 40 a khela, France senior team lamah pawh Didier Deschamps chuan ko tawhin, vawi thum a inlan tawh bawk.

Real Madrid hi beisei ang ngei ngei in bazar-ah an che na chho zela, mi tam tak rinlawk a ni. Tun season liamta chiah khan an che tha lo hle a, La Liga-ah pathumna niin an hmelma lian ber pahnih Barcelona leh Atletico Madrid hnuaiah an awm.

A zawna vawi thum Champions League nomawi an chawi hnuah an squad thlak danglam a ngaih tawh zia tun season khan kan hmu a, bazar-ah na taka an chet tur thu sawi lawk pawh an awm nuala, a thleng dik chho mek niin a lang a ni.