club lian Real Madrid chuan Serie A striker an hel mek tih Argentina manager Jorge Sampaoli chuan a sawichhuak.

Real Madrid hian Inter Milan striker Mauro Icardi an hel mek tih Sampaoli chuan a sawi chhuak a, Icardi hian tun season Serie A game 24 khel tawhin goal 18 lai a khung tawh. Ani aia goal khung hnem pakhat chiah a awm a, chu chu Lazio foward Ciro Immobile niin, ani hian goal 20 a khung tling tawh a ni.

Thawhtanni khan Icardi chuan Instagram-ah Inter a chhuahsan dawn hnai tih hriat theih turin post a siam a. "Kan inmangthana hun chu a hnai zel a," tiin bye bye emoji a hmang nghe nghe. Nilaini hi January transfer window inkhar hun a ni tawh a, hemi hma ngei hian Real Madrid chuan lak hman an tum dawn niin media te chuan an tarlang.

Argentina manager Sampaoli pawhin Icardi chungchang a sawi zauh bawk a, "Icardi ka bia a, 'season chawhnu lamah pawh theihtawp i chhuah chuan World Cup khel tura koh i ni ang,' tiin ka hrilh. Tin, Real Madrid pawhin tunah hian an hnimhnai hle nghe nghe a ni," tiin Argentine TV a hrilh.

Kum 2013 khan Icardi chuan Sampdoria atangin Inter Milan a zawm a, Inter tan game 170 khel tawhin goal 96 a khung tling tawh a ni. Real Madrid hi tun season La Liga-ah palina ni mekin hmahruaitu Barcelona chu point 19 laiin an thlau mek.

Real Madrid manager Zidane chu ban maitheih dinhmunah a ding mek nia ngaih a ni. Season chawhnu lamah an hmatawng thuamthat a; Champions League title humhim leh ngei chu a hna pawimawh ber a ni dawn ta a. Icardi hian Real Madrid hmatawng pahnih Benzema leh Cristiano Ronaldo te league goal khung belhkhawm aiin goal 8 laiin a khung tam zawk a ni.