Real Madrid chuan Eden Hazard leh Paul Pogba te la lut turin tih tak zeta hma lak an tum tan niin an sawi a. Hazard hi £85 million vela lei dil phawt an tum niin an sawi.

Hun eng emaw chen chu Eden Hazard leh Real Madrid te hi an sawi zawm ta a, Hazard chuan Stamford Bridge-ah kum khat chiah contract a nei tawh a. Tun season chhungin game 44 khelhah goal 19 a thun tling tawh a, a chet that em avangin club lian thenkhat chuan an hmutai hle a ni.

UEFA Champions League atanga Manchester United an tlak tak avang leh tun hnaiah Premier League lama an chet fuh theih lutuk loh avangin Real Madrid chuan Paul Pogba lak dan an ngaihtuah tel mek bawk niin an sawi a. Season thara Champions League an khel thei dawn lo a nih phei chuan Pogba hian hmun dang pan daih hi a duh a rinawm a ni.

French star Pogba hian 2021 thleng Old Trafford-a awm turin contract a la nei a, season tharah Manchester United hian UEFA Champions League an khel thei dawn lo a nih chuan Pogba hlawh hi 25% velin tihhniam a ngai dawn zui a ni.

Spanish club lian Real Madrid hian Eden Hazard leh Paul Pogba te hi an la lut ve ve dawn a nih chuan a lo berah £200 million vel chu an sen ngei a ngaih hmel hle a. Manchester United chuan France midfielder Pogba chu £100 million aia tlawm chuan hralh an tum lo hle.

Ram tana vawi 66 khel tawh Pogba hi Manchester United chuan contract thar ziahpui duh viau mahse amah ber hian Spanish club zawm hi a hreh loh thu a sawi chhuak tawh a ni.

Zinedine Zidane chuan Real Madrid squad chu tihdanglam nasat a tum hle a, squad chu a siksawi kual vak ang a, an player neih sa eng emaw zat chu a hralh dawn a, a player duhzawng eng emaw zat chu lei belh a rilruk a ni.