​Real Madrid-in champion an hnaih ta hle

11th July 2020, 09:07AM

Real Madrid chuan La Liga inkhelah Alaves chu Estadio Alfredo Di Stefano-ah an lo mikhuala, Real hian si hnih faiin hnehna an changa, champion an hnaih ta hle.

He inkhelah hian Karim Benzema leh Marco Asensio te chuan Real Madrid tan hian goal an khunga, Real hi point thum hlu em em mai an hlawhchhuahpui.

Khelh 35-ah Real hian point 80 hlawhchhuak tawhin hmanhruaitu an ni zela, khelh thum chiah awm tawha, pahnihnaa awm Barcelona aiin point liin an sang zawk. Alaves dinhmun a tha lova, khelh 35-ah point 35 hlawhchhuak tawhin, 17-naah an awm mek.

Inkhel tan tir teah mikhual lam Alaves hian chance tha em em mai an nei nghala, Joselu chuan crossbar a pet per hnuah Varane chuan line atangin ball a clear leh thei hram bawk.

Minute 10 khelh a nihin Real hian penalty an hlawhchhuak a, Navarro chuan Real fullback Mendy chu box chhungah titlu in, Real-in penalty an hlawhchhuaka, penalty spot atang hian French striker Benzema chuan Real Madrid hmahruaina goal a khung.

20mins chuang hret khelh a nihin Alaves player Camarasa chuan an lamaha tilut palh teuh hle a, mahse Roberto chuan a save thei hram. Darkar chanve khelh a nih hma chiahin Alaves lamin chance tha tak an nei a, mahse Real goalkeeper Thibaut Courtois chuan Burke-a shot tha zet chu a aia tha in a lo save.

Second half-ah minute tam khelh a nih hma in Real-in goal an khung belha, Benzema chu offside anga lang position-ah ball pek a ni a, mahse offside ham a ni lo; Benzema hian Asensio pe ve lehin, Asensio hian goal-ah a lo chan tir a, VAR-a endik a nih hnuah Benzema chu a offside loh avangin goal hi kaltlangpui a ni.

Darkar khat khelh a nih hma hretin Real hian an goal thumna tur an khung teuh hle a, Benzema shot chu Roberto chuan lo save-in Asensio chuan cross ball lo kal chu goal-a lo chan tir tum mahse a khawih hman lo. Goal lut belh tawhin lovin, Real Madrid hi 2-0 in Alaves lakah hian an chak ta a ni.

Real Madrid 2-0 Alaves

(Benzema 11’ pen, Asensio 51’)

Player Ratings

Real Madrid - Courtois 8, Vazquez 5, Varane 7, Militao 5, Mendy 8, Kroos 6, Casemiro 6, Modric 6, Asensio 7, Rodrygo 8, Benzema 7. Subs - Isco 6, Hazard 5, Valverde 5, Vinicius 6, Brahim 3.

Alaves - Roberto 7, Navarro 4, Laguardia 5, Ely 5, Marin 5, Camarasa 6, Fejsa 5, Burke 8, Edgar 6, Perez 6, Joselu 7. Subs - Martin 5, Rodriguez 5, Rioja 6, Sainz 5, Mahmoud 4.

Copyright © inkhel.com 2024. All rights reserved.