Real Madrid in €500 million hman tur an nei dawn: Capello

19th April 2019, 03:04AM

Fabio Capello chuan transfer window inhawn hunah Real Madrid chuan player leina tur €500 million (£430 million/$560 million) zet an nei dawn niin a sawi.

England manager hlui Fabio Capello chuan Los Blancos hi vawi hnih a lo enkawl tawh a. 1996-97 season leh 2006-07 season-ah te Real Madrid chu enkawlin, La Liga title a lakpui ve ve a ni.

Italian manager Capello hi tunah chuan pundit niin, Real Madrid kaihhnawih thil chu a la hre hneh hle nia sawiin, mi rintlak deuhin nipui transfer window inhawn huna an pawisa neih zat tur hi a hrilh niin a sawi a ni.

Capello chuan, “Barcelona khawpuiah ka kal a, mi rintlak deuhin nipui hunah Real Madrid chuan player leina tur hian €500 million zet an nei dawn tih min hrilh a. A thil sawi chu a hriat chian leh chian loh ka zawt a, a chian thu sawiin, Real Madrid chinchang hre chiang em emtu atanga hemi chungchang hi ri chhuak tan a nih thu a sawi a ni,” a ti.

Real Madrid chuan season an hmang tha vak lo hle a, tun dinhmunah La Liga-ah pathumna an ni mek a, UEFA Champions League-ah Ajax an hneh zo lo a, Copa del Rey semi final-ah an hmelma lian Barcelona chuan an zinkawng an titawp bawk a ni.

Juventus lam pana Cristiano Ronaldo a chhuah hnuah Los Blancos chuan manager pahnih - Julen Lopetegui leh Santiago Solari te chu an ban hman tawh a, season tawp hnaih lamah an manager hlui Zinedine Zidane chu an la lut leh a ni.

An beisei anga an chet theih loh avangin Zinedine Zidane chuan season thar atan squad siksawi nasat a tum thu a sawi a. Zidane hian transfer window inhawn hunah ‘Galactico’ thar lak ngei a tum hle a, tun atang hian player lak tur a thlithlai kual nasa tawh hle.

Chelsea winger Eden Hazard chu Real-in an melh hmasak ber niin, tun hnaiah Manchester United midfielder Paul Pogba chu an sawi ri leh bawk a. Anni pahnih hi an la lut thei dawn a nih chuan €100 million man chuang ve ve ni tura ngaih an ni.

Copyright © inkhel.com 2024. All rights reserved.