Eden Hazard chuan Real Madrid chu hman atanga a duh tawh thu sawiin, tun thleng hian Spanish club a duhna hi a la reh theih loh thu a sawi.

Hazard hian Stamford Bridge-ah 2020 thleng contract a la nei a, UEFA Champions League title kawltu Real Madrid nen hian tun hnaiah an sawi zawm deuh reng a. Belgium star hian Spanish club lian zawm hi a chak thu a sawi chhuak ve reng bawk a, transfer window inhawn dawn hnaihah thawm a tam zual viau a ni.

Chelsea coach Maurizio Sarri chuan tun hnaiah Hazard chu contract chungchang an sawipui dawn niin a sawi thin a, mahse heti chung hian kum 27-a upa Hazard chuan Premier League club in contract thar an zawrh hun a nghah thu sawiin, Real a duh tawp theih loh thu hi a sawi chhuak a ni.

“Chelsea nen chuan kan inbe deuh thuak a, mahse thawm a reh leh ta daih a, ka la ngaichang leh mek a ni,” tiin Hazard chuan a sawi.

“Min hre chiang a, Real Madrid hi ka duh em em reng a, Zidane hun hma pawh khan ka duh tawh a. Eng thil nge thleng zel dawn tih chu han ngaichang phawt ila, kan la hre chho ve mai dawn a. A hmaa ka lo sawi tawh angin kumin chu Chelsea ah hian ka hmang dawn a, kum khat daih contract ka la nei a, kumin hi han ral se engtin nge ni zel tih chu kan hre thei maiin ka ring,” a ti bawk.

Hazard hian tun season chhungin Chelsea tan inelna hrang hrangah goal 8 a thun tawh a, “Coach Sarri hian football ka thlir dan ang chiahin a lo thlir ve a, chanchin chu kan la nei chho zel turah ngai ila. London khawpuiah kan chhungkua kan awm mek a, kum 28 ka ni ve tawh dawn a, football ka chawlhsan hnuah inchhirna neih loh ka duh a. Thutlukna ka siam ngei dawn a, engtikah nge tih chu la sawi theih loh mahse eng hunah emaw tak chuan a la thleng ngei dawn a ni,” tiin a sawi.