Joachim Low chuan a contract neih lai a hman zawh hunah Real Madrid enkawl chakawm a tih thu a sawi a, Bundesliga velah chuan awm a tum loh thu a sawi.

Germany coach Joachim Low hian 2004 atang khan German FA chu contract a ziahpui a, 2022 thleng an inzawm dawn a. Low hian 2014 FIFA World Cup-ah Germany chu a champion pui a ni.

Kuminah Russia rama World Cup khelhah khan champion lai Germany chu an che chhe hle a, group stage an paltlang zo lo a, an title kawl lai chu an humhim lo chiang viau a. Hei mai hi a la ni lo a, UEFA Nations League Group A ah pawh an che thei lo hle a, Low chuan kumin chu kum chhia a nih thu sawiin, a hma lam hun tur a thlir tan tawh tih a sawi.

Low chuan, “Beiseina sang tak nen ka contract neih lai hi hman zawh theih ngei ka duh a, national team coach ka nih chhung hi a rei tawh dawn lo a, ka contract neih lai a zawh chuan kawng dang ka zawh tawh maithei a ni,” a ti.

A sawi zelnaah, “Nakinah chuan ram enkawl loin club enkawl ve tawh a chakawm ka ti a, chawlh lampang chu ka rilruah a la lang lo hle a. Club ka enkawl dawn a nih pawhin Germany chhungah a nih ka ring lo a, Bundesliga velah ni loin ram dangah daih ni se ka duh ang,” a ti bawk.

Real Madrid chungchang an zawt tel a, Joachim Low chuan, “Anni ang club ropui European champion ni bawk si te chu coach zawng zawngin enkawl an chak vek ang chu,” tiin a chhang.

Kum 58-a upa Joachim Low chuan 2020 European Championships hma chuan Manuel Neuer chu paih thlak a tum nia an sawi chungchangah thu belh chian dawl lo mai a nih thu a sawi chhuak.

“Thil mak danglam tak te a thleng thut a nih loh chuan Neuer hi No. 1 a ni zel dawn a, European Championships thlengin a la ni zel dawn a. Barcelona tana Marc-Andre ter Stegen chet dan pawh hi ka hmuh hmaih lo a, nasa takin hma a sawn a, world class ni ve tawh mahse Manu hi 2020 thleng chuan No. 1 chu a la ni reng dawn,” tiin Joachim Low chuan a sawi.