12 Jun 2019 05:50

inkhel

Real Madrid chungchang sawina hun a ni lo: Mbappe

Kylian Mbappe chuan Euro 2020 qualifying-a France a chakpui hnuah Real Madrid chungchang sawi hun a nih loh thu a sawi.

Paris Saint-Germain forward Kylian Mbappe hming chu tun hnaiah a ri nasa hle a, Spanish club lian Real Madrid nen an sawi zawm nasa a, Paris khawpui chhuahsanin Madrid khawpui lama kal tur angin an sawi a ni

Tun hnaiah Kylian Mbappe hian hmun dangah hma thar lak te pawh thaa a hriat thu a sawi chhuak a. Hetiang tawngkam a neih avang hian mi tam tak chuan Paris Saint-Germain chhuahsan a rilruk niin an sawi phah a. Chhuak tur anga sawi a nih takah chuan Santiago Bernabeu lam pan thei tur angin an sawi zui bawk a ni.

France chuan Thawhlehni khan Euro 2020 qualifying-ah an khingpui Andorra chu 4-0 ngawtin an hneh a, hemi hnu hian Mbappe chuan thu thang vel chu sawi zui hun a nih loh thu a sawi chhuak.

Chanchinbumiin an kawmnaah Mbappe chuan, “Tun hi chu Real Madrid chungchang sawi chhuahna hun a ni lo a. Mi reng reng hian zawhna inang min zawt nawn leh thin a, eng pawh chu ni se hemi chungchang hi tunah chuan sawi chhuah chi a ni lo,” a ti.

Mbappe hian France tan goal thunin, an ram leh club tan goal 100 chu a thun tling ta der a. Kum 20-a upa Mbappe hian inkhelh tan atanga minute 11-ah goal thunin France chu hma a hruaipui a, a tawpah 4-0 in an chak zui a ni.

Senior game 180 a khelh tawhah Kylian Mbappe hian inelna hrang hrangah season hnih chhungin goal 87 a thun thei a. Thawhleh zana goal a thun kha ram tana goal 13 a thunna chiah a ni.