Sunday zan khan La Liga inkhelah Real Madrid chuan Cadiz an tlawh a, khual mualah Los Blancos hi si thum faiin an chak a, point 3 nen an haw.

He inkhelah hian Jude Bellingham chuan Real Madrid tan goal a khung leh a, Bellingham bakah hian Rodrygo chuan Cadiz lakah hian goal hnih a thun bawk a, Real Madrid hi La Liga table chung berah an chho.

Real Madrid hian inkhelh an tan atanga 14mins-ah an goal hmasa ber an thun a, Rodrygo chuan veilam atangin ball a lakluh hnuah top far corner-ah mawi takin ball a pet lut a, si khat faiin Real hma a hruaipui.

Darkar khat chuang hret an khelhin Rodrygo chuan Real goal hnih leh a goal hnihna ni bawk a khung leh a, a goal hmasa zawk nen a inang viau nghe nghe a, dinglam atanga a cut luh hnuah top right corner-ah ball a chhuih lut leh.

78mins-ah Bellingham chuan Real goal thumna a khung a, Bellingham hian heti hian tun season-ah league goal 11 a khung tawh. English midfielder hian record thar a siam a, Real Madrid tana a game hmasa 15-a goal khung hnem ber niin, Real tana competition hrang hranga game 15 a khelh tawhah goal 14 a khung tawh a, assist vawi 3 a nei tawh bawk.

Bellingham hma hian Cristiano Ronaldo leh Di Stefano te chu Real tan an game hmasa 15-a goal khung hnem ber an ni a, Ronaldo leh Di Stefano te hian Real tana an game hmasa 15-ah goal 13 ve ve an khung.

Inrinni khan La Liga champion lai Barcelona chuan Rayo Vallecano chu 1-1 in an inhnehtawkpui a, Atletico Madrid chuan Mallorca chu si khat faiin an hneh bawk.

Khelh 14 atangin Real in point 35 an hlawhchhuak tawh a, La Liga hmahruaitu thar niin, an hnuai chiaha awm Girona nen point khatin an inthlau a, Girona hi khelh khatin an khel tlem zawk. Pathumnaah Atletico Madrid awmin, Atletico hian game 13 ah point 31 an nei a, Barcelona chu palinaah awmin, Catalan club hian game 14 ah point 31 an nei a ni.