La Liga club lian Real Madrid chuan manager thar tur an zawng mek niin a lang a, Argentina head coach Lionel Scaloni chu nakkuma an manager tur atan an duh niin sawi a awm thar mek.

Tuna Real Madrid manager ni lai Carlo Ancelotti chuan tun season zawhah Real Madrid a chhuahsan dawn niin a lang a, Italian manager hian Brazil national team a enkawl dawn nia sawi a ni.

Ancelotti chhuah leh chhuah loh tur chungchang hi official announcement eng mah la awm lo mah se, Ancelotti hian nakkum nipui atangin Brazil a enkawl ngei a rinawm chho zel a, Real Madrid pawh an inbuatsaih tan niin chanchinbu thenkhat chuan an ziak.

Los Blancos hian Scaloni hi an pe pawp tawh niin Argentina chanchinbu Doble Amarilla chuan a tarlang a, Scaloni hian Argentina head coach a nihna atanga ban a rilruk thu a lo sawi thawi tawh bawk nen Real Madrid manager thar a ni lovang tih a sawi theih loh.

Kum 45 mi Scaloni hian, “Argentina hian manager chak tha tak leh dam tha tak an mamawh a, ka hmalam hun ka ngaihtuah a ngai a, thil tam tak ngun taka ngaihtuah tur ka nei.

"Tu mah ka mangtha tihna erawh a ni lova, mahse beiseina a san em avangin chak reng leh theihtawp chhuaha kal reng a ngaih avangin ka inngaihtuah a ngai. FA president leh player te pawh ka inngaihtuah hnuah ka sawipui ang,” tiin a lo sawi tawh.

Scaloni hian Argentina hi kum 5 chhung a enkawl tawh a, kum 2018 August thla khan Jorge Sampaoli thlakin Argentina hi a enkawl tan. Nikum khan World Cup-a Argentina hi a champion pui a, hemi hma hian kum 2021 khan Copa America a chawipui bawk a, kum 2021-a Copa America an chawi hi kum 28 hnua Argentina hi major trophy an chawi leh vawi khatna a ni nghe nghe.

Argentina in nikum World Cup an chawi kha World Cup nomawi an vawi thum chawina a ni a, kumin June thla khan Finalissima-ah Argentina hian Euro champion lai Italy chu si thum faiin Wembley-ah an hneh leh bawk a ni.