Real Madrid chu bazar-ah an buai hle a, Luka Jovic leh Eden Hazard-te an lawmluh fel hnu lawkah Japanese rawlthar duhawm tak Takefusa Kubo chu Tokyo FC atangin an lalut leh ta.
Kubo hi tun nipui chhunga Real Madrid player lakluh parukna a ni a, Real hian Kubo bakah Jovic, Hazard, Eder Militao, Ferland Mendy leh Rodrygo Goes-te an lalut tawh bawk.
Kum 18 mi Kubo hi ball thiam tak a ni a, tlar hma lamah khelh theih lohna a nei lo; Japanese media lam chuan ‘Japanese Messi’ ti hialin an lo kova, Barcelona leh PSG pawhin lakluh tum ve bawk mahse Real hian an chang ta zawk.
Real hian an website-ah thuchhuah siamin Kubo hi an B-team Real Madrid Castilla lamah a khelh tur thu an sawia, tunlai football khawvela rawlthar beiseiawm ber zinga mi a nih thu an sawi bawk.
Kubo hi Castilla lamah khel rih dawn mahse beisei anga a chet thata, beisei a phak phawt chuan Real hian senior team lamah an lak chhoh thuai a rinawm.
Real Madrid an inthuamtha nasa hle a, player beiseiawm tak tak an kawl sa bakah an lalut thar nual bawk nen, an hma hun a eng hle a ni.