Belgian football expert Kristof Terreur chuan Chelsea thiampuipa Eden Hazard chu Real Madrid-a kal ngei a duh tawha, Chelsea-in contract an zawrh pawh a hnar zel niin a sawi.

Hazard hi Zinedine Zidane-a’n Real a enkawl lai atang tawhin Real nen hian sawi zawm a lo ni tawha, Real pawh hian dawr tawh mahse Chelsea lamin an la hnar zel rih. Hazard ngei pawh hian vawi tam tak Real-a khelh a chak thu a lo chhakchhuak tawh thin a, Chelsea fans thenkhat chu an beng a kham tawh hle pawhin a rinawm.

Kum 28 mi hian tun season bakah season khat dang bak Chelsea-ah hian contract a nei tawh lova, hemi a nih avang hian Real hian chance an nei tha hle a, Hazard hian contract thar a ziak duh lo zel a nih phei chuan Chelsea chuan kumin nipui bazar hunah Belgium captain hi an tihral mai a ngaih hmel.

Terreur chuan, “Hazard hian Chelsea-ah contract thar a ziak duh rih lova, vawihnih a hnar tawh. Contract thar a ziak duh lo a nih chuan eng emaw beisei leh nghah a nei tihna a ni a, chu chu Real Madrid an ni. Ka hriat chinah chuan Real Madrid hian Hazard hi an la duh renga, mahse an la che chhuak leh rih lo.

“Tunah chuan inremna engmah an la neihpui lova, Chelsea nen pawh inremna an nei lo. Nikum nipui lai ang khan phone call tak ngial pawhin Chelsea an la be pawp lo,” a ti.

Sawi zelin Terreur chuan, “Nikum nipui laia an biak kha chuan Marina Granovskaia chuan Hazard chu zawrh lai a nih loh thu a lo hrilh a, Real pawhin chu chu an ngaihpawimawh sak. Mahse an squad thuam that a ngaih em avangin season tawpah Real hi an rawn lan leh ngei a rinawm a, player-ten an contract-ah kum khat chiah an neih tawh chuan lakluh an awlsam tawh a ni,” a ti bawk.