10 Jan 2019 09:28

inkhel

Real leh United in Kalidou Koulibaly an beisei

Real Madrid chuan Manchester United in an thlithlai mek Kalidou Koulibaly chu an hmutai ve tan a, Koulibaly hi Spain lama hruai theih an tum hle niin an sawi.

Manchester United chuan Napoli defender Kalidou Koulibaly hi an enthla rei ve ta hle a, nikum nipui lai atang tawh khan beisei melhin an melh tawh a. Khatih laia an manager Jose Mourinho chuan an tlar hnung phui tha lo lutuk tiphuisuitu atan a duh a, world record transfer ni thei turin an dil ve hman a ni.

Italian chanchinbu pakhat Il Mattino chuan tun hnai khan United in Koulibaly hi lak an tum a nih pawhin chuhpuitu an nei hrawl dawn hle niin an tarlang a. Season khat leh a chanve chhungin Senegal defender Koulibaly hi a che tha chho bawk a, khawvela defender tha berte zinga sawi tel a ni tawh a ni.

Koulibaly hming a rik nasat tak em avangin Real Madrid chuan lak theih ngei an duh phah a, tun season kal mekah an tum anga an chet fuh theih loh avangin an dinhmun siam tha thei turin January thla chhung ngeia lak an rilruk an niin an sawi.

Napoli chuan Senegal defender hi an hralh dawn a nih pawhin £90 million aia tlawm chuan hralh an tum loh thu an sawi chiang tawh a. Real Madrid hian an hmelma Barcelona chu point 10 ngawtin an pha tawh lo a, hei vang hian an inkar zau a lutuk tiziaawm turin Koulibaly hi lak ngei an duh a ni.

Jose Mourinho chhuah hnuah pawh Manchester United chuan Senegal defender hi an la thlir zui reng tho a. United thuneitute chuan Ole Gunnar Solskjaer chu January thla chhungin pawisa pek an inhuam niin an sawi a, Koulibaly hi thlasik transfer window inhawn chhung hian lak an duh niin an sawi bawk a ni.