Real Madrid chuan Paul Pogba chu Manchester United atanga lak theih ngei an duh hle a, tun hnaiah khan player pali zet mai an tawktarh niin an sawi.

Zinedine Zidane chuan hun rei tak chhung chu Paul Pogba hi a lo ngaihven tawh a, tun hnaiah phei chuan lak luh theih ngei duhin hma pawh a la tan niin an sawi a ni.

France midfielder Paul Pogba hi a inhliam avangin tun season chhung chuan a inlan tlem hle a, vawi 8 chiah a la inkhel a, hengah hian goal a thun lo a, mi goal thun tur erawh chu vawi 2 a siamsak hman a ni.

Manchester United midfielder Pogba chu Madrid khawpui lama kal thut thei dinhmuna ding niin an sawi nasa chho viau a, hetiang karah hian Real Madrid manager Zidane chuan player pali hmanga thleng a phal tawh niin an sawi bawk a ni.

Zidane chuan Pogba hi James Rodriguez leh Martin Odegaard te bakah Lucas Vasquez leh Brahim Diaz te nen inthleng a phal tawh niin an sawi a. Hetih lai hian Manchester United manager Ole Gunnar Solskjaer chuan Pogba inhliam a dam leh ta bawk a, chhawr chhoh a rilruk ve mek bawk a ni.

Solskjaer chuan World Cup winner Pogba hi January thlaa an lak thar Bruno Fernandes nen mual laia awm dun turin a duh a, tun kar atangin anni pahnih hian training pawh an zawm dun a ni.

La Liga club hian nipui transfer window inhawn hunah player lak luh an tum ho chu lak hram dan kawng dap nasat an tum hle a. Coronavirus vangin an sum dinhmun a tlahniam a, hetiang dinhmuna an din avang hian sum tam tak theh chhuak loin player inthleng dan kawng an zawng mek a ni.