Real Madrid chuan ‘Operation €200 million’ kalpui an tum mek a, an player neih sa thenkhat chu hralhin, Manchester United atanga Paul Pogba lak ngei an la tum hle.
Los Blancos hian an player neih sa panga hralh chhuah a, an hralhna hmanga Manchester United midfielder Paul Pogba chu €200 million a lei tumin hma lak an tum a. Player hralh chhuah tura an ruahman zingah Gareth Bale, James Rodriguez, Dani Ceballos leh Marco Asensio te chu an tel.
French midfielder Paul Pogba hi Real Madrid hian an beiseina a rei ve ta hle a, nipui transfer window inhawn chhung ngei hian lak hman an duh a, an duhna tipuitling turin kawng an dap kual nasa viau a ni.
Spain rama chanchinbu pakhat AS chuan Real Madrid hian Gareth Bale, James Rodriguez, Dani Ceballos, Marco Asensio leh Isco te chu Santiago Bernabeu atanga chhuahtir an rilruk niin an tarlang a. Heng player panga an hralhna atanga an pawisa hmuh hmangin Pogba chu lei an tum niin an tarlang.
Chanchinbu lar tak Marca pawhin World Cup winner Pogba lei an duh tak tak a nih chuan an player neih sa hralh phawt a, sum tuak hmasak a tul thu an tarlang bawk a. Manchester United chuan an midfielder Pogba chu €200 million (£180 million) aia tlawma hralh an tum loh thu pawh an tarlang bawk a ni.
Player hralh tura an chhawp hran zingah hian Gareth Bale chu a buaithlak hmel ber a. Welsh winger Bale hian tun hnaiah Real Madrid chhuahsan a duh loh thu a sawi chhuak a. A hlawh a san em avang hian club thenkhatin lak duh viau mahse an lak ngam loh phah a, hetiang a nih zel chuan Bernabeu-ah a contract a hmang zo lo ang tih sawi theih a ni tlat lo.
Bale hi tun hnaiah Premier League lama kir thei tur anga sawi a awm nual a, mahse a tawpah chuan a hlawh bawk chu harsatna a ni zel a, duhtu nei mahse a sasehah an tlanchhe zel mai a ni.
Atletico Madrid leh Napoli te chuan James Rodriguez an hmutai hle a, Tottenham Hotspur leh Arsenal te chuan Dani Ceballos chu an lo thlithlai ngun viau bawk a. Marco Asensio leh Isco te chu an tla na tawh lo viau bawk a, season thar atan Zinedine Zidane chuan ruahmannaah a telh dawn leh dawn loh a hriat theih loh a ni.
Paul Pogba agent Mino Raiola chuan France midfielder chungchang hi a khat mawi tawkin a sawi ri leh zauh thin a, Old Trafford chhuahsan tur angin a lo sawi ve leh thin a, hei hian boruak a chhem alh ve leh thin a ni.
“Pogba hi vawiinah chuan Manchester-ah a awm a, naktukah chuan engtin nge ni zel dawn ka sawi thei lo. Football-ah chuan thil chiang tak tak a awm lo a, eng pawh thleng thei vek a ni,” tiin Raiola chuan a sawi.