10 Jul 2019 05:57

inkhel

Real-in Arsenal hnenah Mariano Diaz an zuar

Arsenal chuan transfer window inhawn chhunga pawisa hman tur an nei tlem hle a, heti chung hian Real Madrid chuan an striker Mariano Diaz chu an zawrh niin an sawi.

Unai Emery chuan player leina tur £45 million chiah a dawng a, an squad chu siksawi nasat a ngai viau a, an sum neih hi an duhkhawp lo hle a. Season tan leh hunah chuan UEFA Champions League khel thei tura tan lak an tum viau a, chutiang dinhmuna dinpui thei tur player pawh an lei thei meuh dawn lo niin a ngaih theih thung.

Sum dinhmun a that loh viau lai hian Spanish club lian Real Madrid chuan an striker pakhat chu Gunners hi an lo zawrh ve mek a. Mariano Diaz hi Real chuan £18 million in Arsenal chu an zawrh a, engtin nge an chhan let dawn a la hriat loh.

London khaw club hian position hrang hrangah player thar an mamawh nual a, a bik takin winger, full-back leh centre-back te chu an mamawh zual deuhte an ni a. Forward pawh hi mamawh belh tho mahse chutiang lei tur chuan sum tam tak erawh an theh chhuak thei dawn lo chiang a ni.

Mariano Diaz chuan loan-in Lyon a zawm a, season liam taah khan Santiago Bernabeu lamah a kir leh a. Mahse, beisei angin Spain-ah hian boruak a nei fuh thei vak lo a, hei vang hian Real Madrid chuan hralh chhuah mai hi an hreh loh phah a ni.

Gunners chuan Alexandre Lacazette leh Pierre-Emerick Aubameyang te an nei mek a, anni pahnih hi an inkawp fuh chho hle a, an dam tha a nih chuan forward dang pawh chuti vakin an mamawh lutuk rih lo niin a ngaih theih a. Heti chung hian £18 million chauh senga forward tha pangngai tak an lei theih dawn chuan thil tha tak chu a ni thung.

Danny Welbeck chu a chhuak ve leh chiah tawh a, a hmaa Lacazette leh Aubameyang te tha chhang dawltu ber a ni a, a chhuah takah chuan a aiawh thei tur chu Arsenal hian an mamawh ve tho bawk a. Hetiang tur hian Diaz hi itawm ve tham tak chu a tih theih a ni.

Diaz hian season liam taah khan La Liga game 13 a khel a, goal 3 chu a thun a. Rinrawl berah a tang ngai lo a, Karim Benzema aiawhtu ang chauhin an hmang thin a ni.

Tun hnaiah Arsenal chuan Saint-Etienne atangin centre back William Saliba chu an be fel niin an sawi a, £26 million vel bawra lei turin an indawr a. Inrem tawh mahse kum 18-a upa Saliba hi loan-in an kawl zui leh nghal dawn thung a ni.

A hma deuhin Arsenal hian Crystal Palace an dawr tawh a, Ivory Coast forward Wilfried Zaha chu £40 million a lei an dil a, mahse Palace hian an dilna hi an hnawlsak thung a. Celtic player Kieran Tierney pawh Arsenal hian an beisei viau a, Napoli nen an thlithlai dun mek a ni.