Club World Cup semi-final ah Real Madrid chuan Egypt club Al Ahly chu 4-1 ngawta hnehin final an lut.

Real Madrid tan hian Vinicius Jr chuan half-time hma min. 3 ala awm awm tihah goal hmahruai a rawn khung a. Second-half khelh atanga rei lo teah Federico Valverde chuan rawn thun belh lehin, Al Ahly hian penalty atangin Ali Maaloul hmangin an rawn thun ve leh a. Real Madrid hian hma la hruai zawk mah se stoppage time-ah Rodrygo leh Sergio Arribas te hmangin goal an thun belh leh a, hnehna an chang chiang hle.

He inkhelah hian harsatna hrang hrang tawk mek kum 22 a upa Vinicius Jr goal thun hi an manager Carlo Ancelotti chuan a chhuang hle a, "Player tha bik a nihzia min hmuhtir a ni," tiin a sawi.

Al Ahly hian February ni 11 (Inrinni) dar 9 ah hian Flamengo nen pathumna nih inchuhin an inkhel dawn a, hemi zan vek zanlai dar 12:30 ah hian Real Madrid leh Al-Hilal te'n final match hi an khel dawn a, hetah hian Ballon d'Or award hnuhnung ber dawngtu Karin Benzema pawh a inlan theih tawh ngei beisei a ni.

Final lut ve tho Al-Hilal hian Flamingo hi 3-2 in an hneh ve bawk.

Al Ahly coach Marcel Koller hian an hnehna chan zawh tak loh avang te, an tlarhnung phui tha tawk lo avang te leh second-half a an hun tha neih an bawhbelh chungchang chu sawiin pawi a ti hle a, "Result hrilhhaithlak tak a ni, a chhan chu Real Madrid lakah khan kan team kha kan khel tha a, mahse goal thun theihna hun remchang kan hlah thin avang khan a ni.

"Vawiinah kan chak lo a, mahse Inrinniah kan theihtawp kan rawn chhuah leh ang," tiin a sawi.

African team hmuhnawm ber pawl leh khawvel huap pawha team hlawhtling ber pawl Al Ahly hian semi-final an thleng zing hle a. Vawi 10 lai African champion pawh lo ni tawhin, he inelnaah hian European team te hneh thei hmasa ber nih an tum ruh hle. Kum 2006, 2020 leh 2021 ah te khan pathumna dinhmun an lo hauh tawh bawk a ni.