Tun season Champions League group stage draw neih a nih tum khan Group H-ah Real Madrid, Borussia Dortmund, Tottenham leh APOEL Nicosia te an awm khawm, team tha pathum zingah Spurs chu chan chhe ber tur nia ngai an tam hle.

Champions League group stage match li khelh a ni ta a, Tottenham chuan Group H atangin knock out stage an inpet kai ta der mai. Nizan khan Wembley Stadium-ah champion lai 3-1 ngawtin Spurs hian an hneh.

Kar hmasa khan Santiago Bernabeu-ah team hnihte hi an inhmachhawn tawh a, 1-1 in an inhnehtawk a nih kha. Khami tum khan Spurs that zia hahipin kan sawi, Wembley Stadium-ah 3-1 ngawtin hnehna an chang zui leh bawk si a, Spurs chuan team tha an nih zia Europe mipui te lakah an puang chhuak mek e.

Tottenham tan Alli chuan goal hnih khungin Eriksen chuan goal khat a khung bawk a, si thum faiin hma an hruai, hun tawp dawn minute 10 a la awm tihin Cristiano Ronaldo chuan Real tan goal khat a khung ve leh hlauh a, 3-1 in Spurs chuan hnehna an chang. Khelh li atangin Tottenham hian point 10 an hlawhchhuak a, Group H hmahruaitu niin KO Stage an lut ta, Real Madrid chuan point 7 an nei a, Dortmund leh APOEL ten point 2 ve ve an nei, anni pahnih pawh hi KO stage la lut thei dinhmunah an la ding mek.

Tottenham 3-1 Real Madrid

(Alli 27', 50', Eriksen 65') (Ronaldo 80')

Spurs - Lloris 7, Trippier 8, Alderweireld 6, Sanchez 7, Vertonghen 8, Davies 7, Dier 8, Eriksen 8, Winks 7, Alli 8 , Kane 7. Subs: Sissoko 6, Dembele 5, Llorente 5.

Real Madrid - Casilla 4, Achraf 4, Nacho 3, Ramos 4, Marcelo 4, Kroos 4, Modric 4, Casemiro 2, Isco 3, Ronaldo 5, Benzema 2. Subs: Asensio 5, Mayoral 5, Theo 5.

Hamstring hliam avanga Premier League match hnuhnung ber khel thei lo Harry Kane chuan Real Madrid a hmachhawn thei, inkhelh tan atanga reiloteah chance a nei nghal, Cassila chip khum a tum a, mahse a duh aiin a pet na lo, Real Madrid goalkeeper Casilla tan harsata a thlen thei lo.

Goal hmasa ber hi 27 mins-a lut a ni a, Harry Winks chuan mual dinglam sira Kieran Trippier tan ball tha tak a vawrh, ani hian vawi khatah a cross nghal, box chhunga lo awm Dele Alli chuan a tlawh goal, si khat faiin Tottenham chuan hma an hruai.

First half tawp dawnah Spurs hian goal khungna hun tha an nei leh a, Kieran Trippier thawhrah chu Sissoko leh Kane ten an tel teuh hle, Ramos a lo awm hlauh a, Real Madrid-in first half-ah si hnih an phur lo hlauh.

Second half tan a ni a, rei an khel hman lo, 56 mins-ah Alli chuan a goal hnihna a khung. Alli chuan veilam atangin dinglamah ball a lalut, box chhung a thlenpui vel chiah tihin a shot, Ramos a petper, a goal chhunzawm.

Hemi hnu chiah hian Real Madrid chuan corner atangin goal khungna hun tha tak an nei a, hnai set sawt atanga Ramos shot chu a team-mate Ronaldo chuan a lo dan sak. 65 mins-ah Tottenham chuan Eriksen hmangin an goal thumna an khung.

Harry Kane pass tha tak chu Eriksen chuan umin box chhung atangin cool takin a pet goal, si thum faiin Spurs chuan hma an hruai ta, hun tawp dawn minute 10 a la awm tihin Marcelo cross chu Borja Mayoral chuan Ronaldo pet atan a siam, Ronaldo chuan tihsual nei miah lovin chiang set sawtin a pet goal a, goal dang a lut tawh lo, 3-1 in Spurs chuan hnehna an chang ta a ni.

Kar tawp khan Real Madrid chu Girona lakah an tlawm, tunah Spurs lakah an tlawm chhunzawm. Benzema hi a vanneih tum chuan goal khungah harsatna an nei lo, mahse tunlai chu a vannei hleithei ta lo. Chelsea lamah Morata an hralh ta kha an ui ve khawp ang le. Real Madrid hian striker tha tak pakhat lak belh an mamawh hle niin a a lang.

Mauricio Pochettino hi coach tha a ni a, Spurs hian tun nipui bazarah khan player thar club dang angin lei tam lo mahse player naupang rualte an rawn puitling chho ta. Season hmasa khan mualpho takin Champions League atanga pet chhuah kha an ni a, tun season-ah erawh English club zingah Manchester City nen Knock out stage lut thei hmasa an ni ta. Spurs hian hnehna chang mahse an lawm a kim lo, Alderweireld chuan hamstring hliam a nei tlat mai, kar hnih thum ve chu a chawlh ve a ngai dawn niin a lang.