Barcelona leh Real Madrid te chu zaninah hian Camp Nou-ah an inkhel dawn a, mual neitute hi an chak a nih chuan head-to-head ah a vawi khatna atan an sang thei chiah dawn a ni.
Spain rama club ropui ber pahnihte hi 1929 hnuah La Liga bikah vawi 178 zet chu an inhmachhawn tawh a, hengah hian team pahnihte chu vawi 72 ve ve an chak tawh a ni.
Ernesto Valverde pawlte chuan zaninah hian point 3 an hmu thei a nih chuan La Liga-ah point 3 a hma an hruai theih dawn mai bakah an hmelma kumhlun lakah kawng khatin an chungnung thei dawn a. League bika El Clasico an khelhah a vawi khatna atan Barcelona chu an chungnung ve thei chiah ang.
Inelna hrang hrangah chuan Real Madrid hi El Clasico-a chak tlem zawk an ni a, Barcelona chuan 96-95 in hma an hruai a. Kumin March thlaah khan Real Madrid hian Barca an hneh lo a, hei vang hian 1931 hnua a vawi khatna atan El Clasico bikah a chak tlem zawk an nih ve phah ta a ni.
El Clasico chungchanga thlirna hrang hrangte han tarlang ila.
400 - Barcelona chuan El Clasico goal 400 thun tling turin goal khat chiah an mamawh tawh a. Real Madrid chuan a vaiin goal 403 an thun tawh thung.
6 - Real Madrid hian La Liga bikah Barcelona hneh zo loin match 6 an khel tawh a, vawi hnih an inhnehtawk a, vawi 4 an tlawm a, December 2011 hnua El Clasico bika an chet chhiat ber tum a la ni.
3 - Lionel Messi chuan Real Madrid an hmachhawn hnuhnun vawi thumah goal a thun loh mai bakah mi goal thun tur a siamsak tawh lo a. Goal thun lo emaw, mi goal thun tur siamsak lo emaw hian Real Madrid lakah game 4 chu a khel tluan ngai lo.
43 - Real Madrid captain Sergio Ramos a inlan a nih chuan El Clasico khel hnem ber a ni thei ang a, vawi 43 a khel tling chiah dawn a. Vawi 42 khel tling Manolo Sanchis, Francisco Gento leh Xavi te chu a khum chiah ang.
42 - Lionel Messi chu Barcelona player zinga El Clasico khel hnem ber a ni ve thei dawn a, vawi 42 khel hman Xavi chu a nihrual thei chiah ang.
10 - Luis Suarez chuan goal a thun a nih chuan Barcelona player zingah Real Madrid laka goal 10 emaw, a aia tam emaw thun thei pathumna a ni thei dawn a. Lionel Messi chuan goal 18 a thun tawh a, Cesar Rodriguez chuan goal 12 a thun tawh bawk a ni.
7 - Lionel Messi leh Luis Suarez tih lohah chuan Antoine Griezmann chu Real Madrid laka La Liga goal thun hnem ber a ni a, 2010-11 season tir atangin game 18 khelhah goal 7 a thun tawh a ni.
7 - Ernesto Valverde chuan El Clasico bikah inelna hrang hranga Barcelona head coach zinga chak loh nei loa kal tluang rei ber record chu a nihrual thei dawn a, vawi 4 chak tawhin, vawi 2 an inhnehtawk a. Record ding lai chu April 2011 leh January 2012 inkarah khan Pep Guardiola chuan a lo siam tawh a, vawi 4 an chak a, vawi 3 an inhnehtawk a ni.
4 - Zinedine Zidane chu inelna hrang hrangah Camp Nou-ah vawi 4 chu a la tlawm lo a, vawi hnih chakin vawi hnih an inhnehtawk a. An tlawm lo a nih chuan Real Madrid boss zingah chuan Barcelona khelmuala El Clasico-a a zawna vawi 5 tlawm lo thei hmasa ber a ni ang.