RB Leipzig director Rouven Schroder chuan Timo Werner chhuahna an dal dawn lo tih a sawi.

Tun season-ah Werner hian inkhelhna hmun a chang thei meuh lova, Bundesliga-ah vawi hnih bak inkhel bul la tan lovin, Champions League-ah minute 30 bak a la khel lo bawk a, Leipzig chhuahsan a duh niin chanchinbu mite chuan an ziak nasa hle.

Kum 27 mi hian 2020 nipui laia Chelsea a zawm hma khan Leipzig hi season li a chenchilh tawh a, England-a beisei a phakloh avangin nikum Thitin thla khan £25m-in a kir. Lois Openda leh Benjamin Sesko-te an awm avangin khelhna hmun a chang meuh lova, thlasikah emaw nakkum nipuiah emaw a chhuah a rinawm.

Schroder chuan, "Kan squad hi ngun takin kan en reng a player danglam bik kan duh. Werner hian hun harsa a hmachhawn mek a, a dinhmun kan hriatin hrehawm kan tihpui khawp mai. Amaherawchu khelhna hmun chang leh turin a bei thei a, amahah thiamna leh theihna tha tak a awm tih kan hria. Chhuah a duh anih chuan dan kan tum lo thung a, elpui tur a neih avangin a khel reng thei bik lo a ni." tiin a sawi.

Werner hian season hmasa Bundesliga-ah khan goal kua a khung a, game 27 khelin game 23-ah inkhel bul a tan. English Premier League-a a khelh chhungin goal sawm chiah a khung a, £47.5m man lai ni mahse a hlawhchham chiang hle a ni.