FIFA U20 World Cup khelh mek a ni, Germany midfielder kum 19 mi Marc Stendera chuan ngaihven a hlawh hle. He naupang talent nei tha tak hian 2013 khan Bayern Munich hmachhawnin Eintracht Frankfurt tan debut match a khel.

Top Flight League-ah Eintracht Frankfurt tan game 26 khel ve tawhin, goal 3 a khung tawh a, assist vawi 5 lai a nei tawh bawk. New Zealand-a FIFA Under 20 World Cup-ah hian goal 4 a khung tawh nghe nghe.

He attacking midfielder hian ball chak tak takin a tlanpui thei a, a ball pek a fing thinin goal thunna khawpa ball tha a hnen atang hian match khat chhungin vawi 5 vel zel a chhuak nia sawi thin a ni. Ball pet a thiamin, free kick leh set piece-ah a tangkai em em bawk.

Kum 19 mi lek a ni a, a la naupan avangin Eintracht Frankfurt chuan dim takin an enkawl mek, hetiang zela hma a sawn chho a nih chuan tun atanga reiloteah khawvela club lian ten an la inchuh vat dawn a ni.

December ni 10, 1995 khan Kassel, Germany-ah piangin, 5 ft 7 in chauhva sang a ni a, A naupan laiin TSV Heiligenrode leh OSC Vellmar te a zawm hnuah Eintracht Frankfurt chuan 2010 khan an naupang ni turin an lalut. 2012 khan Eintracht Frankfurt chuan kum 17 mi lek ni chungin first team-ah an hlangkai ta a ni.