13 Jan 2020 04:11

inkhel

Rashford hi player tha ber pawl a la ni dawn: Maguire

Harry Maguire chuan Manchester United striker Marcus Rashford chu khawvela player tha berte zinga awm thei a nih thu a sawi.

Marcus Rashford chu tun season chhungin a che tha chho viau a, Manchester United manager Ole Gunnar Solskjaer chuan tlar hmaah rinrawlah a nei chho a, manager berin a rin ngam takah chuan rintlak a nih zia chu khelmualah a lantir ta thin a ni.

Inrinniah khan Manchester United chuan 4-0 in Norwich an hneh a, he inkhelah hian kum 22-a upa Rashford chuan goal hnih a thun a, an club tana game 200 a khelhnaah thawm lian tak a nei thei a. Ram leh club tana game 23 a khelhah goal 19 zet chu a thun tawh a, tun dinhmunah Premier League Golden Boot dawng thei turin pahnihnaah a awm mek a ni.

Manchester United defender Harry Maguire chuan Rashford hi a fak hle a, Three Lions tana training an neihnaah te pawh a that zia a lang chhuak chiang a ni tih sawiin, hmabak duhawm tak a neih thu a sawi chhuak.

Maguire chuan, “Kuminah Marcus hian goal a thun thei hle a, hetianga a phu ang taka goal a thun chho hi ka lawmpui hle a. Tun ai hian hma pawh a sawn belh zel ka ring tlat a, chuti maiin a la duhtawk dawn lo tih hi ka ring nghet tlat a ni,” a ti.

“Goal hi a la thun belh zel a rinawm a, season tawp hma chuan goal thun hi a duhtawk maiin a rinawm lo a. England tana training kan neihnaah te hian a che fuh thei hle a, a thiamna te, a ball khawih dante hi a dik thlap zel mai a ni,” a ti bawk.

A sawi zelnaah, “A thiamna te, a inpekna te ngaihtuah hian tun aia dinhmun sangah hian a la awm zel dawn tih a chiang a, khawvela player tha berte zingah a la tel thei ngei dawn a ni,” a ti.