08 Jun 2019 04:07

inkhel

Raptors tan vawi khat chak chiah a ngai tawh

Toronto Raptors chuan Game 4-ah Golden State Warriors an hneh a, a vawi khatna atan NBA title lak an hnaih tawh hle a, vawi khat chak chiah an hmabak ta.

NBA Finals Game 4-ah hian Raptors chuan Warriors chu 105-92 in an hneh a, heti hian Toronto chuan 3-1 in hma an hruai mek a, champion tur chuan vawi khat chak chiah an mamawh tawh a ni.

Kawhi Leonard chu he inkhelah hian a che tha deuh ber niin, point 36 a score bakah rebound 12 a la bawk a. 2014 Finals MVP lo ni tawh Leonard hi first quarter atangin a che tha chho hle a, a tawp thlengin a tlahniam lutuk lo a tih theih.

Half time a thlen chuan Kawhi hian point 13 a score hman a, Raptors chu dinhmun thaah a awmpui thei zel a. 2019 playoff chhungin Kawhi Leonard hian point 30 hi vawi 14 a score tling ta chiah a, an khelh tawh zawng zawngah point 20 a score tling deuh vek a, postseason-a Raptors nen an in khelh tum hinhah chiah a score tling lo a ni.

Klay Thompson chuan point 28 a score a, Stephen Curry pawhin point 27 a score bawk a, hengte hi Warrios chhanhimna atan chuan an tangkai pha ta chiah lo a. Warriors hi an thiampuipa Kevin Durant inhliam vangin a khel tel ve ta lo.

Warriors chuan theihtawp chhuahin Raptors chu lehthal theih an tum viau dawn a, 2014-15 Western Conference Finals atang khan hetianga hun harsa tak hi an la hmachhawn miah lo a. Hemi tumah hian Golden State chu seven-game series-ah an chak ta zawk a, Oklahoma City Thunder an hneh hnu 2016 NBA Finals-ah khan Cleveland Cavaliers an hneh lo a ni.