10 Sep 2020 04:10

inkhel

Raptors leh Celtics te’n Game 7 an khelh a ngai

Toronto Raptors chu dinhmun hlauhawm taka an din hnuah an che fuh leh hlauh a, Boston Celtics hnehin Game 7 an khelh a ngai dawn.

Eastern Conference semi final Game 6 an khelhah Toronto Raptors chu an che chhe teuh hle a, fourth quarter-ah a umtu zawkah an tang a, first overtime-ah pawh a umtu niin, second overtime thlengin a umtu an ni chho a, Celtics chuan final an luh ngei a rinawm tawh a ni.

An chau tawh a, hun tawp a hnai tawh hle a, NBA champion lai Raptors chuan theihtawp an chhuah a, an khingpuite chu an lehthal leh hlauh a, best-of-seven series an khelh mekah 125-122 in an chak a, 3-3 a nih theih phah a. Final lut tur zawk ti chiang turin Game 7 an khelh a ngai dawn a ni.

Double overtime-ah Game 3 a che tha ber, hun tawp ruala Raptors chakpuitu Anunoby bawk a inlar leh a, minute 1 pawh a awm tling tawh lo tihin 3-pointer a thun hlauh mai a, hei hi an tangkaipui ta hle a, hun tawpah 125-122 in an chak theih phah ta a ni.

Kyle Lowry chuan Raptors tan minute 53 chhungin point 33 a thun a, Norman Powell chuan point 23 a thun bawk a, hengah hian three-point bakah free throw vawi thum a tel a. Fred VanVleet pawhin point 21 a thun a, Anunoby chuan point 13 a thun bakah rebound 13 a la bawk a ni.

Jaylen Brown chuan Celtics tan point 31 a thun bakah rebound 16 a la a. Jayson Tatum chuan point 29 thunin rebound 14 a lak bakah assist 9 a nei a. Marcus Smart chuan point 23 a thun a, rebound 11 a la bakah assist 10 a nei a ni.

Los Angeles Clippers chuan 96-85 in Denver Nuggets an hneh a, a vawi khatna atan Western Conference final an lut teuh tawh hle a. He inkhelah hian Kawhi Leonard chuan point 30 a thun a, rebound 11 lain, steal 4 leh block 2 a nei a. Postseason game bikah Leonard hian point 30 aia tam hi vawi 6 a thun tling tawh a ni.

Reserve Montrezl Harrell chuan Clippers tan point 15 a thun a, best-of-seven series an khelh mekah 3-1 in hma an hruai tawh a ni.

Nikola Jokic chuan point 26 a thun a, rebound 11 a la a. First round-ah pawh Utah in 1-3 in hma an hruai tawh hnuah Nuggets hian an lo lehthal tawh a, hetiang dinhmuna din hnua an khingpuite lehthal leh thei NBA team 12-na an ni a, Clippers hi lehthal leh theih an tum dawn a ni.