04 Sep 2020 03:26

inkhel

Raptors in Celtics an hneh ve hram

Toronto Raptors chuan hun tawp dawnah point pawimawh tak an thun a, Boston Celtics chu 104-103 in an hneh theih phah.

OG Anunoby chuan hun tawp rualin three-point a thun a, Raptors chuan NBA title an kawl mek humhim thei turin ke an pen zui zel theih phah dawn a. Anunoby hian thun lo ta se Celtics hi an chak dawn a, three-point a thun hmang hian point 1 in an chak thei hlauh a ni.

Kyle Lowry chuan hun tawp dawnah hian ball a chang a, ball chu Boston center Tacko Fall ban phak loh chiahin a vawm phei a, Anunoby chuan a lo dawng a. A ball dawn hi Anunoby chuan Raptors chakpuina atan a lo hmang a, Eastern Conference semi final series-ah hian 1-2 in an la hnufual tho a ni.

Anunoby chuan, “Hun tawp ruala ka shoot khan ka thun ngei kha ka ring tawp mai a. Hlah tuma shoot ka ni lo a, a luh pawh khan mak ka ti hran lo,” a ti.

Postseason series khelh tawh reng rengah NBA team zingah 0-3 a hnufual tawh chak zui leh thei an la awm ngai lo a, chak ta lo se Raptors chu 0-3 in an hnufual thei dawn a, an tan beisei a sang vak thei dawn tawh lo a. Tuna 1-2 a nih hi chuan beiseina sang tak an la nei ve thei a ni.

He inkhelah hian Kyle Lowry chuan Raptors tan point a thun hnem ber a, point 31 a score bakah rebound 6 lain assist 8 a nei bawk a. “Ka ball pass kha chu engmah a ni lo a, OG chet dan kha engkim tidanglamtu chu a ni a. Khatiang taka shoot thei kha an tam lo a, OG hi a fakawm hle a ni,” a ti.

Fred VanVleet chuan point 25 a score a, heng zinga point 17 chu second half chhunga a thun a ni a. Pascal Siakam pawhin point 16 a thun a, heng zinga point 14 hi chawlhlawk hnu lama a thun an ni bawk a. Anunoby chuan Raptors tan hian point 12 a thun ve bawk a ni.

Jaylen Brown chuan point 19 a thun a, rebound 12 a la a, Jayson Tatum pawhin point 15 a thun bawk a. Inrinniah hian game 4-na chu an khel leh ang.