Ranking tharah Virat Kohli a la chungnung hram

11th December 2018, 10:12PM

India captain Virat Kohli chu ranking thar berah a dinhmun a la zia zel a, a chungnung ber a la nih chhunzawm zel a, Cheteshwar Pujara leh Jasprit Bumrah te pawhin hma an sawn ve bawk a ni.

ICC in Test ranking an tih chhuah thar berah hian Cheteshwar Pujara chu Top 5 ah a lang chho thei a, Australia nen Adelaide Oval-a an inkhelh tumin run 123 leh 71 a siam a, hei vang hian hma a sawn theih phah a. Pujara hian Joe Root leh David Warner te lehpein palinaah a awm a, pathumnaa awm Smith chu point 55 in a la pha lo a, a hnuai chiaha awm Root aiin point 39 in a sang bawk a ni.

India fast bowler Jasprit Bumrah chu 33-naah a awm a, tun tum hi ranking-a a thlen san ber a la ni a, Adelaide Oval-ah 3/47 leh 3/68 te a puitlin avangin hetiang dinhmunah hian a din theih phah a. Ranking hnuhnung ber aiin tun tumah hian hmun nga ngawtin hma a sawn chho a ni.

Kane Williamson chu New Zealand batsman-ah chuan ICC Player Ranking-a Test Batsmen zinga point 900 hmu tling thei hmasa ber niin, a pumpuiah chuan hetiang ti thei 32-na a ni bawk a. Pakistan leh New Zealand in Test an khelhah kum 49 chhunga a vawi khatna atan New Zealand chu away series-ah a chakpui thei a ni.

Williamson hian Pakistan nen Abu Dhabi-a an inkhelh hian run 89 leh 139 te a vaw chhuak a, New Zealand chuan run 123 in Pakistan an hneh theih phah a. Williamson hi Player of the Match atan an thlang a, ranking tharah hian point 37 a hmuh belh bawk a, hei vang hian Australian batsman Steve Smith chu a lehpe a, a vawi khatna atan point 913 hmu tlingin pahnihna dinhmun hi a hauh theih phah a ni.

Virat Kohli chuan point 15 hmuin a pumpuiah point 920 a hmu a, a chung berah chuan a la awm thei hram a. A hnuai chiaha awm Williamson nen an inthlauhna hi point 7 chauh a ni.

Copyright © inkhel.com 2024. All rights reserved.