22 Apr 2019 07:37

inkhel

Ranking tharah Djokovic a sang fal

Novak Djokovic chu ATP ranking thar berah hmahruaitu niin, a hnuai chiaha awm Rafael Nadal nen an inthlauhna pawh a tam sawt hle.

Thawhtannia ATP ranking chhuak tharah Novak Djokovic chuan point 11,160 a hmu a, pakhatna dinhmun a hauh chiang hle a. Pahnihnaa awm mek Rafael Nadal chuan point 8,085 a hmu a, Djokovic leh Nadal inthlauhna hi point 3,075 zet a tling a ni.

Spaniard Nadal chuan Monte Carlo Masters title 12 a la tling thei ta rih lo a, hei vang hian ranking tharah pawh a dinhmun a siam that theih loh phah a. Tun hnaia Grand Slam tournament pathuma champion vek Djokovic erawh chu a sang fal tial tial thung a. Kar hmasa khan Principality quarter final-ah Daniil Medvedev chuan hneh mahse tu mahin an hnaih phah chuang lo a ni.

World No. 2 Rafael Nadal chuan Monte Carlo Masters semi final-ah Fabio Fognini a hneh lo a, a title kawl lai chu a humhim thei ta lo a, ranking point pawh a hloh phah nual a. He tournament-ah hian Nadal-a hneh loh Fabio Fognini chu a champion zui ta nghe nghe a ni.

Kum 31-a upa Italian player Fognini chuan Masters trophy a lak zarah a ranking tharah hian 12-na a ni thei a. Pathiannia final an khelhah Serbian Dusan Lajovic chu straight in a hneh a, ranking hmasaa a awmna aia hmun rukin a kaisang a, Top 10 a hnaih sawt hle.

ATP Top 20:

1. Novak Djokovic (SRB) 11,160 pts

2. Rafael Nadal (ESP) 8,085

3. Alexander Zverev (GER) 5,770

4. Roger Federer (SUI) 5,590

5. Dominic Thiem (AUT) 4,675

6. Kevin Anderson (RSA) 4,115 (+1)

7. Kei Nishikori (JPN) 3,690 (-1)

8. Stefanos Tsitsipas (GRE) 3,240

9. Juan Martin del Potro (ARG) 3,225

10. John Isner (USA) 3,085

11. Marin Cilic (CRO) 2,845

12. Fabio Fognini (ITA) 2,840 (+6)

13. Karen Khachanov (RUS) 2,730 (-1)

14. Daniil Medvedev (RUS) 2,505

15. Borna Coric (CRO) 2,480 (-2)

16. Milos Raonic (CAN) 2,050 (-1)

17. Marco Cecchinato (ITA) 2,041 (-1)

18. Nikoloz Basilashvili (GEO) 1,930 (-1)

19. Gael Monfils (FRA) 1,875

20. Denis Shapovalov (CAN) 1,820