Thawhtannia Women’s Tennis Association (WTA) ranking chhuak tharah Romanian star Simona Halep chu a dinhmun pangngaiah a la awm a, dinhmun sang ber a la luah zel a ni.
Simona Halep hian point 7,871 hmuin world no. 1 a la nih chhunzawm a, a hnuai chiahah hian point 6,910 hmuin Denmark star Caroline Wozniacki chu a awm a. Wimbledon champion lai Garbine Muguruza, Spain chuan point 6,550 a hmu a, pathumna a ni.
Sloane Stephens, USA chuan point 5,463 hmuin palinaah a awm a, point 5,250 hmutu Elina Svitolina, Ukraine chu pangana a ni a, a hnuai chiahah hian point 4,960 hmuin Caroline Garcia, France a awm bawk.
Czech Republic mi Petra Kvitova chuan point 4,610 a hmu a, pasarihnaah a kaisang a, a hmaa pasarihnaa awm, Czech Republic star tho Karolina Pliskova chu pariatnaah a tla ve thung.
Venus Williams, USA chuan point 3,971 hmuin pakuana a ni a, Angelique Kerber, Germany chuan point 3,545 a hmu a, Top 10-ah a lang pha chiah a ni.
Association of Tennis Professionals (ATP) ranking thar berah Spanish star Rafael Nadal chu pakhatna a la ni zel a, pahnihna dinhmun luahtu Switzerland star Roger Federer aiin point 50 in a la sang zawk a ni.
Rafael Nadal hian point 8,770 a hmu mek a, Roger Federer hian point 8,720 a hmu bawk a. Pathumnaah hian point 5,755 hmutu Alexander Zverev, Germany a awm a, palinaah Juan Martin del Potro, Argentina chu awmin, Potro hian point 5,080 a hmu a ni.
Marin Cilic, Croatia chuan point 5,060 a hmu a, pangana a ni a. Grigor Dimitrov, Bulgaria chuan point 4,780 hmuin parukna a ni bawk a. Pasarihnaah hian point 3,835 hmutu Dominic Thiem, Austria a awm bawk.
Point 3,635 hmuin Kevin Anderson, South Africa chu pariatnaah a awm a, pakuanaah chuan point 3,110 hmutu David Goffin, Belgium a awm a. John Isner, USA chuan point 3,045 hmuin Top 10-ah a awm pha chiah bawk a ni.
Mipa ranking-ah hian Bosnian Damir Dzumhur chu a kaisang nasa deuh ber a, Antalya Open title a lak hnuah a hma aiin hmun sarih ngawtin a kaisang a, 23-naah a awm.
WTA ranking:
1. Simona Halep (Romania) : 7,871
2. Caroline Wozniacki (Denmark) : 6,910
3. Garbiñe Muguruza (Spain) : 6,550
4. Sloane Stephens (USA) : 5,463
5. Elina Svitolina (Ukraine) : 5,250
6. Caroline Garcia (France) : 4,960
7. Petra Kvitova (Czech Republic) : 4,610
8. Karolina Pliskova (Czech Republic) : 4,315
9. Venus Williams (USA) : 3,971
10. Angelique Kerber (Germany) : 3,545
ATP ranking:
1. Rafael Nadal (Spain) : 8,770
2. Roger Federer (Switzerland) : 8,720
3. Alexander Zverev (Germany) : 5,755
4. Juan Martín del Potro (Argentina) : 5,080
5. Marin Cilic (Croatia) : 5,060
6. Grigor Dimitrov (Bulgaria) : 4,780
7. Dominic Thiem (Austria) : 3,835
8. Kevin Anderson (South Africa) : 3,635
9. David Goffin (Belgium) : 3,110
10. John Isner (US) : 3,045