Roger Federer chuan ATP Tour-a player rank hniam zawkte hamthatna tur a ngaihtuah a, an lawmman dawn tur pawisa chu tihsan a duh thu a sawi.
US Open khelh mekah Roger Federer chuan Bosnian player Damir Dzumhur chu 3-6, 6-2, 6-3, 6-4 in a hneh a. A chak hnuah hian Federer chuan tennis a khelh tirhte nen khaikhin chuan lawmman chu a sang tawh hle niin a sawi a. Hetih rual hian tlema player rank hniam zawkte tan thuneitute chuan pawisa la dah hnem deuh se a tih thu a sawi chhuak.
Tun thlaah Federer hi Rafael Nadal nen ATP Player Council-ah an thlang a, ATP tournament velah sum a awm tho avangin main draw thleng thei ta lo tana pawisa an dah chu thuneitute chuan tipung tura a duh thu hi a sawi a ni.
Federer chuan, “Tunah chuan pawisa dawn tur hi tam zawk dah a nih theih nan hma lak kan tum ang a. Hei hi nawr chhuah theih ngei kan duh a, theihtawp kan chhuah ang. Tournament buatsaihtute chuan first round pal tlang ta lo leh second round pal tlang thei ta lote tana pawisa dah belh hi an chak vak lo a ni,” a ti.
“Challenger player te bakah qualifying leh second round vela chak ta lote hian tun aia tam zawk hi dawng thei se ka ti khawp mai a. Lawmman hi an tipung zel dawn a nih chuan a sang lamah ni loin a hniam lamah zawk hian ni thei tawh se. A chung lamah hi chuan a pung tha tawh viauin ka hria a, a hniam lamah hian tun aia tam zawk hi a nih ve a ngai a ni,” a ti bawk.
Flushing Meadows-ah hian mipa leh hmeichhe champion te chuan $3.85 million ve ve an dawng a, first round khelte chuan $58,000 an dawng a, kum hmasa lam aiin $4,000 chuan an tipung a ni.
Challenger Tour leh Grand Slam qualifier vela khelte chuan pawisa lamah harsatna an tawk fo a. Thleng sang thei si lo, hun pum pe ve thinte chuan sponsor mumal an nei thei lo fo a. Hetiang dinhmun laklawh taka an din thin avang hian Federer chuan tennis player tam tak chu sum lama harsat avanga an zuihral mai a hlauh thu a sawi a ni.
“Chak zel tluka hlu leh ropui chu a awm hauh lo a, hetih rual hian chak lote pawh an hun zawng zawng sengin an inbuatsaih a, theihtawp an chhuah ve vek a. An thawhrimna leh an hahna man hu hi chu an hmuh ve ngei a thain ka hria a. Tun atanga kum 5, kum 10 velah chuan a nih theih tawh ngei ka ring,” tiin Federer chuan a sawi a ni.