Arsenal chuan Juventus pan tur Aaron Ramsey hmun ruak luahtu tur an zawng mek a, hemi tur hian Hoffenheim midfielder Kerem Demirbay chu an hmutai hle.
Season kal mek tawp hunah Aaron Ramsey chuan Emirates Stadium chhuahsanin Juventus lam a pan tawh dawn a. A hmun ruak kalsan hnawh khahna tur chu Arsenal hian an zawng chho tan tawh a, tunah chuan German midfielder Kerem Demirbay chu an rilruah a tla na deuh ber a ni.
Kerem Demirbay chungchangah hian Arsenal chuan Hoffenheim an bepawp tan tawh niin German chanchinbu lar Bild chuan an tarlang a. Tun season chhungin Demirbay hian Bundesliga-ah goal 4 a thun tawh a, mi goal thun tur vawi 8 a siamsak tawh bawk a, season tharah UEFA Champions League khelh theih an tum hle.
1899 Hoffenheim hi Bundesliga-ah parukna an ni mek a, palinaa awm Eintracht Frankfurt aiin point 5 bawr velin an hniam rih a, tun season chhungin vawi nga khelh tur an la nei a, chak chhoh vek a, Champions League khel thei dinhmuna din chu tuna an tum ber a ni.
Demirbay hi tun hnaiah club thenkhatin an ngaihven thar hle a, Arsenal mai bakah hian Turkish club thenkhat chuan an thlithlai ngun viau bawk a. Arsenal hian player leina tur pawisa an nei hnem vak dawn lo niin a hriat a, hei vang hian player tha si, man tlawm si an zawng nasa hle a. Demirbay-a contract-ah hian release clause £22 million a awm a, heti a nih chuan Arsenal tan lak luh a huphurhawm lo deuh dawn a ni.
Kum 25-a upa Kerem Demirbay hi Turkish mi niin, youth level atangin German club-ah a khel chho nghal a. 1999 khan FC Schalke 04 ah a lut a, he club-ah hian kum eng emaw zat a awm hnuin Borussia Dortmund leh SG Wattenscheid 09 ah te a khel leh bawk a. Turkey tan youth level-ah a khel zet a, mahse a hnuah Germany tana khelh a thlang ta zawk a ni.
2016 atangin 1899 Hoffenheim a zawm a, game 63 khelhah goal 12 chu a thun tawh a. Turkey U19 team tan game 7 khelin goal khat a thun a, Turkey U20 team tan game 3 khelin, Turkey U21 team tan game 2 a khel hman bawk a. 2017 khan Germany tan a khel tan a, ram tan hian vawi hnih khel tawhin goal khat chu a thun tawh a ni.