Arsenal midfielder Aaron Ramsey chu season zawhah a chhuak dawn chianga, Italian champions Juventus nen inremna nei tawhin, pre-contract pawh an ziak tawh niin Sky Italia chuan a tarlang.

Ramsey hian kar liamta tawp lam khan Juventus-ah medical a nei fel niin Sky Sports chuan a tarlang bawk a, Juventus hian February thlaah an puanzar beisei a ni bawk.

Welsh midfielder Ramsey hi Arsenal-a a contract neih lai chu season zawh ruala a zawh ve dawn avangin kumin January ni khat atang khan tu tan pawh biak pawh theih a ni tawh a, free-agent la fuh thei tak Juventus chuan season thar atan Ramsey hi a thlawnin an lalut leh ngei dawn niin a lang.

Kum 28 mi hi Arsenal-in chelh duh hle mahse contract thar a ziak duh tawh lova, trophy chawi turin Italy lam a pan dawn a nih hmel a, mi tam takina khawvela footballer tha bera an chhal Cristiano Ronaldo nen an khel dun thuai dawnin a lang.

Juventus bakah hian Paris Saint-Germain leh Bayern Munich-te pawhin Welsh midfielder hi lakluh tumin an be pawp ngei niin Sky Sports chuan a tarlanga, mahse Italian heavyweight Juve lamin an chang dawna, season thar atang chuan Premier Legaue-ah Ramsey-a hmel kan hmuh tawh hmel loh hle.

Ramsey hian kum 2008 khan Welsh club Cardiff City atangin Arsenal hi a zawma, kum sawm chuang awm tawhin goal 53 a khung tawh a, Premier League game 253 a khel tawh bawk. Tun season bikah Ramsey hi Gunners tan vawi 31 inlan tawhin, goal li a khung tawh a ni.