11 Feb 2019 11:27

Inkhel

Mizo Sports Website hmasa ber

​Ramsey-a'n Juventus a pan ta

Arsenal midfielder Aaron Ramsey chuan Juventus-ah pre-contract a ziak fel ta a, kar khat chhungin £400,000 zet a hlawh dawn.

Kum 28 mi Welsh International hian Juventus-ah kum 4 chhung atan contract a ziak a, kum 11 ngawt Arsenal tan a khelh hnuah tun season tawpah Italy a pan dawn ta a ni.

January thla khan Ramsey hian Juventus-ah medical a paltlang tawh a, kumin June ni 30 thlenga Arsenal-a contract nei Aaron hian free agent-in Juventus a pan dawn, Arsenal-in Ramsey-a transfer-ah han sum an dawng dawn lo a ni.

Kum 2008 khan Ramsey hian Cardiff City atangin £4.8m velin Arsenal a zawm a, inhliam avangin a vanduai thin hle, chuti chungin a thiamna erawh club lianin an hmuh hmaih lo, PSG leh Barcelona te pawhin Ramsey hi an dawr nghe nghe.

Tin, Bayern Munich, Inter Milan leh Real Madrid te pawh Ramsey-a duh em emtute nia sawi an ni bawk. Nikum September thla khan Arsenal chuan Ramsey hi contract thar pek an tum a, mahse hlawh a phut zat club-in an pek theih loh avangin free-in a chhuak dawn ta a ni.

Ramsey hian number 8 position anga khelh a duh a, central midfielder aia hmaa tawlh chhuah duh hle mahse Emery-a game khelhpui danah hetiang position hi hman a ni si lo. Heng te pawh hi Arsenal chhuahsan a duhna chhan nia sawi a ni bawk.

Juventus a zawm hnuah Ramsey hi British player zinga kar khat chhunga hlawh hnem ber a ni dawn. Season 11 chhungin Arsenal tan game 259 a khel a, goal 61 a khung tling tawh a ni.