David Alaba chuan Real Madrid-ah medical neiin, contract pawh a ziak fel ta a, Real Madrid chuan  an defender thar hi an captain kal chhuak ta Sergio Ramos-a jersey no. 4 an pe.

Alaba hian Ramos-a hak thin jersey no.4 ha dawn mahse, Ramos thlaktu a nih loh thu a sawia, Real Madrid-ah chuan David Alaba ni tura a luh thu a sawi.

Kum 29 mi Alaba hian June thla ral rual khan kum 16 a lo cham tawhna Bayern Munich-a a contract hmang zovin, Real Madrid hi free transfer-in a zawma, Real hian Austrian defender hi kum nga daih contract an ziahpui.

Alaba chuan jersey no.4 a hak tur chungchang sawiin, “Ramos hi hetah hun rei tak ropui takin a khela, he number hi a ha a, hruaitu ropui tak team tan a ni. A nihna takah chuan he number chiah hi awl a awm rih thu min hrilha, he number hi club tan a hlutzia pawh ka hria.

“Ka ha tur hi a chhuanawm ka tih rualin ka huphurh bawka, mahse midang nena number inthleng han dil nghal ka hreh bawk nen ka la ta mai a ni. He jersey ka ha tur hi ka phura, he number hlutna hi tihlan zel ka duha, mahse midang nena inkhaikhin tur emaw anmahni thlak tur emawa rawn lut ka ni lova, David Alaba ni tura rawn lut mai ka ni,” a ti.

Sawi zelin, “Ka thatna lai he team tana thawh ka duh a, position hran hranah ka khel theia, player versatile ka ni. He hmunah hian kum 10 chuang fe Ramos a khela, sulhnu ropui tak a hnutchhiah tih pawh kan hre tlang veka, a bula khelh theih kha ka chak hle a ni,” a ti.