Real Madrid captain Sergio Ramos chuan Manchester United midfielder hlui Paul Scholes-a record dinglai chu khumin Champions League chanchina card hmu hnem ber a ni ta.

Tun season-a an Champions League game hmasa berah Real Madrid chuan Roma tumin, si thum faiin an hneh. He inkhelah hian first half-ah Ramos chuan yellow card hmuin, hei hi Champions League-a card a hmuh vawi 37-na chiah a ni a, ani aia hmu hnem an awm lo.

Ramos hi Champions League-ah vawi 115 inlan tawhin vawi 37 lai mai card a hmu tawh a, card hmu zing hle mahse Champions League-ah hian vawi thum bak hnawhchhuah a la ni lo.

Defender tha tak leh hruaitu tha tak a nih ang chiahin, a discipline a chhe hle a, hnawhchhuah pawh a tawk zing hle. Ramos hi season khat chhunga Champions League-a yellow card hmu hnem ber a ni bawk a, 2010-11 season leh 2012-13 season-te khan yellow card vawi nga ve ve a hmu. Tackling thiam lo tak Scholes khan a inkhelh lai khan season khat chhungin UCL-ah a tam berah yellow card pali bak a hmu ngai lo.

Ramos hi La Liga chanchina hnawhchhuah tawk zing ber a ni bawk a, vawi 19 lai red card a hmu tawh. Real Madrid player hawhchhuah ngun ber ni bawkin, vawi 24 ngawt mai hnawhchhuah a ni tawh a, amah dawttu chiah hi Fernando Hierro a ni a, Hierro a letin hnawhchhuah a tawk ngun zawk. Hetiang tak record nei si hian, Spanish defender hian Spain tan vawi 158 khel tawhin hnawhchhuah a la ni ngai lo tung.