Mizoram a first division cricket inelna Mahuma Memorial First Division Screening 2022-23 final-ah Ramhlun Venglai Cricket Club chuan run 195 in Zarkawt Lords an hneh a, a kum zawnin an champion.

First division final hi Inrinni khan Suaka Cricket Ground-ah khelh a ni a. Zarkawt Lords CC in vawm an thlang zawk. RVL batsman te an che tha a, opener C. Vanlalhruaia chuan run 84 siamin Joseph Lalthankhuma'n run 57 a siam.

Midang panga in run sawm aia tam thawh ve hlawm bawkin RVL in over 50-ah run 261 an siam a. Zarkawt Lords bowler zingah Rinsangzela che tha berin wicket thum a la.

Ball nen pawh RVL an che tha leh thova, a tir over 12 chhungin wicket pawimawh panga an la hman. Zarkawt Lords tan Tleipuia'n run 23 a siam tih loh chu run tih tham siam an awm lo. Over 19.1-ah run 66 siamin an out zo.

Tournament chhung zawnga run 321 siam C. Vanlalhruaia chu Best Batsman a thlan a ni a. Match sarih atanga wicket 19 la Rinsangzela chu Best Bowler niin Man of the Series a thlan a ni bawk.

Best batter - C. Vanlalhruaia
Best bowler - Rinsangzela 
Man of the series - Rinsangzela
Man of the Match - Joseph Thankhuma