Mizoram Premier League Season 5 Playoff khel tur Luangmual FC chu Ramhlun South chuan vawiin khan Cheng nuaikhat leh singngain an lei.
Mizorama club hlun Luangmual FC hian MPL Season thum chhung an khel a, season khat erawh hrem an nih avangin an khel ta lo kha a ni a. MPL 4-ah khan table-ah 7-na an nih avangin an relegate lo chiah chiah a, Playoff erawh an khel dawn ta a ni.
MPL 5 khel thei dinhmuna an ding a nih chuan Luangmual FC tih hming an pu tawh lovang a, Ramhlun South hming a pu tawh dawn, engtiang chiahin nge an hming an vuah dawn tih erawh sawi lawk theih a la ni lo, Ramhlun FC/Ramhlun South SC/Ramhlun South FC a engemaw ber hming chu an pu ngei dawn niin a lang.
Ramhlun South hi Football khel thiam tamna veng an ni a, Zo United Assistant coach Samson Ramengmawia, Chanmari FC coach HC Zarzolianate leh Chanmari FC assistant coach C. Lalmuanpuiate hian Playoff chhung chu an enkawl phawt anga, lo inhlangkai ta se, league pangaiah pawh Zara leh Samson-a te hian an veng club hi an enkawl chhunzawm angem ? An enkawl chhunzawm a rinawm zawk tlat mai.
Luangmual FC hi Ramhlun South chuan an hralh chhawng leh dawn a nih chuan Luangmual neitu hmasate hnenah an zawrh leh hmasa ber dawn a, MPL playoff khelh zawh a nih hma chu Luangmual FC tih hming an pu hrih dawn a ni. Samson Ramengmawia chuan,"Ramhlun South Veng hian MPL Club neih ve kan duh a, Luangmual FC neitute'n an club hralh an lo duh tih kan hriatin kan bawhzui ta nghal a ni.
"Kan kal zel dan tur hi sawi theih a la ni lova, keini Zara nen pawh hian kan awm zel dan tur pawh kan la sawi lawk thei lo. MPL-ah hian season khat te te contract kan ziak a, play-off chhung chu Luangmual FC tan hun kan hmang anga, kan inpetkai ve hlauh a nih chuan kan awm zel dan tur kan la rel fel ve dawn a ni.
"Dinthar FC leh Chanmari FC te hi fans nei tha an ni a, anni ang hian keini pawhin veng leh veng inelnaah fans kan nei tha thin hle. Kan inpet kai a nih chuan team thawm nei lian ber pakhat kan nih theih kan inring. Tin, tunah hian Luangmual FC player te'n min la pui chhunzawm zel dawn bawk a, risk kan la a, kan hlawhtlin chhoh ngei kan inring bawk a ni," tiin inkhel.com a hrilh.