Mizoram Premier League (MPL) Season 8 khelh mekah November ni 1, Zirtawpni tlai round 9 match hmasa ber Chhinha Veng FC leh Ramhlun North FC inkhelah chak zawk awmlo in 1-1 in an inhneh tawk a, point 1 ve ve an hlawh chhuak. He inkhelah hian Ramhlun North FC midfielder Lalmawizuala (Astea) chu Man of the match-ah thlan a ni.

Team pahnihte hi round 5-ah in tawngtawhin Chhinga Veng FC hian 3-1 in an hneh tawh a, an intawn vawihnihnaah erawh chak zawk an awm lo. Chhinga Veng FC hian point 14 neitawhin palinaah an tla thla a, Ramhlun North FC hian point 7 neiin pasarina an nih chhunzawm rih a ni.

04:00 PM Chhinga Veng FC 1-1 Ramhlun North FC

(MC Malsawmzuala 85') (Lalmawizuala (Astea 29'(P)

MoM: Lalmawizuala (Astea) Ramhlun North FC

First half-ah Ramhlun North FC chungnung zawkin goal hlauhawm an nei nghal a, midfielder Pekhlua freekick tha zet chu a goal dawn nia alan laiin Chhinga Veng keeper Ruatpuia chuan a dang hman. Ramhlun North chuan nawr chhunzawmin minite 29-ah penalty anhlawh chhuak hlauh. He penalty hi midfielder Lalmawizuala (Astea) chuan goal-ah chantirin an hmahruaina a khung.

Chhinga Veng pawhin an siphurh sutna hun tha vawihnih lai an nei a, midfielder Sawmzela'n box pawn chiah atangin goal chungah chiah apet a, first half huntawp dawnah box chhung veilam sir atangin forward MC Malsawmzuala (Mca) chuan goal sirah chiah a pet zui bawk. Ramhlun North chuan 1-0 ahmahruaiin chawlhlawk an hmang.

Second half-ah Chhinga Veng insiam thain an siphurh sutna hun tha an nei nghal a, mual dinglam sir box pawn chiah atanga midfielder Chungnunga shot tha zet chu Ramhlun North keeper Eddie-a chuan a dan sak a, bench atanga lut Zosangliana'n goal kham chung chiahah a tauh zui bawk.

Chhinga Veng chuan nawr chhunzawmin Sawmzela leh Chungnunga chuan an siphurh sut theihna hun tha an hloh hnuah bench atanga lut defender Muanawma chuan goal kham apetper zui bawk. Goal luh belh lo in Ramhlun North chuan 1-0 in hnehna an chang mai dawn emaw tih hnu huntawp dawn minute 5 ala awmin Sawmzela corner pet tha zet chu box chhunga awm MC Malsawmzuala chuan goal-ah chantirin an siphurh a rul a, goal luh belh tawh lo in 1-1 in an inhneh tawk ta a ni.

November ni 5, Thawhlehni zan dar 7:00-ah Ramhlun North FC hian Aizawl FC an hmachhawn ang a, November ber ni 6, Nilaini zan dar 7:00-ah Chhinga Veng FC hian Chawnpui FC an hmachhawn ang.

(adsbygoogle = window.adsbygoogle || []).push({});