06 Aug 2019 06:08

inkhel

Ramhlun North FC leh Chhinga Veng FC chak zawk an awmlo FC Venghnuai an chak

I-Day Celebration Football Tournament 2019 MPL Club pariat te inelna chu August ni 5, Thawhtanni khan khelh chhunzawm a ni a, group B atangin inkhel vawihnih a awm a, Ramhlun North FC leh Chhinga Veng FC te chak zawk awmlo in 2-2 in an i hneh tawk a, FC Venghnuai chuan 4-3 in Chawnpui FC an hneh.

Inkhel hmasa zawk Chhinga Veng FC leh Ramhlun North FC te chak zawk awmlo in 2-2 in an inhneh tawk a, point 1 ve ve an hlawh chhuak. 

Chhinga Veng FC hi tualchhung football-ah record nei tha ber an ni. Ramhlun North FC hian I Day Champion no mawi chawi ngei tumin player an siksawi nasa a, team tha an nih an lan tir thung. First half-ah Chhinga Veng FC chungnung zawkin Lalsawmzela leh MC Malsawmzuala chuan goal khat ve ve khungin first half-ah 2-0 in hmahruai mahse second half-ah Ramhlun North FC tan M.Lalrintluanga leh Lalthankhuma chuan goal khat ve ve khungin an siphurh an sut a, chak zawk awmlo in khelmual an chhuah san ta a ni.

Inkhel hnuhnungah MPL kaithar FC Venghnuai chuan 4-3 in Chawnpui FC an hneh. FC Venghnuai tan Vanlalthanga, Isak Vanlalpeka, HK Lalhruaitluanga leh Vanlallawma te chuan goal khat theuh an khung a, Chawnpui FC tan Lalthanmawia Renthlei chuan goal hnih a khung a, Crespo Vanlalhriatpuia chuan goal khat a khung ve bawk.

Inkhel tan a ni a, FC Venghnuai chuan inkhel thunun zawkin Vanlalthanga chuan goal hmahruai akhunga, goal dang luh belh lo in 1-0 a hmaanhruaiin hun chanve an hmang zo. Second half-ah pawh FC Venghnuai bawk chungnung zawkah an tang a,  minute 7 chhungin Isak Vanlalpeka, HK Lalhruaitluanga leh Vanlallawma chuan goal khat theuh an khung leh a, FC Venghnuai chuan 4-0 in hmaanhruai ta a ni.

Chawnpui FC chuan an siphurh sut ngei tumin an nawr let a,  Lalthanmawia Renthlei chuan goal hnih khungin Crespo Vanlalhriatpuia chuan goal khat khung belh mahse hunin a daih tawh lo a, FC Venghnuai chuan 4-3 a hnehna changin point 3 an hlawh chhuak ta a ni. 

August ni 6, Thawhlehni Results

12:00 PM Ramhlun North FC 2-2 Chhinga Veng FC

(M.Lalrintluanga 50', Lalthankhuma 80') (Lalsawmzela 21', MC Malsawmzuala 43')

02:15 PM FC Venghnuai 4-3 Chawnpui FC

(Vanlalthanga 34', Isak Vanlalpeka 63', HK Lalhruaitluanga 68', Vanlallawma 70') (Lalthanmawia Renthlei 77', 89', Crespo Vanlalhriatpuia 80')

August ni 7, Nilaini Fixtures

12:00 PM Aizawl FC Vs Electric Veng FC

02:15 PM Chanmari FC Vs Mizoram Police FC

August ni 8, Ningani Fixtures

12:00 PM Chawnpui FC Vs Ramhlun North FC

02:15 PM Chhinga Veng FC Vs FC Venghnuai

August ni 9, Zirtawpni Fixtures

12:00 PM Electric Veng FC Vs Mizoram Police FC

02:15 PM Chanmari FC Vs Aizawl FC

August ni 10, Inrinni Fixtures

12:00 PM Ramhlun North FC Vs FC Venghnuai

02:15 PM Chhinga Veng FC Vs Chawnpui FC

(adsbygoogle = window.adsbygoogle || []).push({});